Hemserekê DEM Partî Tuncer Bakirhanî Mêrdîn de ard ziwan ke înan vera îtîfaqê JÎTEMî şar û bindestan de îtîfaq kerd û wina vat: “Ma do rayîr nêdê polîtîkaya bêkurdanverdayîşî.”

Bakirhanî Dêrik de xîtabê şarî kerd. Bakirhanî vist vîrî ke serranê 90an de Mêrdîn de faîlê meçhulî hetê dezgehê dewlete yê JÎTEMî ra ameyê kerdene û vat: “Ma do pîya qeyûman bişawê. Erdê Dêrikî erdo bereketîn o la tede zulmê DEDAŞî est o. DEDAŞ seba ke kurdî aw û ceyranê erdê xo nêşuxilnê qestî ra nê zulmî keno. Ferasetê DEDAŞî wazeno ke kurdî koç bikerê. La ma do rayîr nêdê polîtîkaya bêkurdanverdayîşî. Nê weçînayîşî seba ma zaf girîng ê.”

Bakirhanî wina dewam kerd: “Her kes vano ke DEM Partî îtîfaqêko nimitkî kerdo. La seke ma soz dabî şarê xo tim bi zelalî têgêrenê. Îtîfaqo ke vera ma ronîyayo îtîfaqê JÎTEMî yo. Ma vera îtîfaqê JÎTEMî şarê xo û bindestan de îtîfaq kerd. Ma do sindoqanê xo bipawê, wayîrê rayanê xo vejîyê û ser bikewê. Ma ancî vanê ke ganî tecrîdê vera Birêz Abdullah Ocalanî bêro wedaritene û meseleya kurdan wa bêra çareserkerdene. Dem demê şarê ma yo. Ez namzedanê ma Devrîm Demîre û Ahmet Turkî rê serkewtiş wazena. Ez bawer kena ke bi rayanê şima ma do cewabê ferasetê qeyûman bidê.”