Sosyologe Sehere Akçinar Bayar îfade kerd ke têgêrayîşê kurdan o ke şaristanan rê vila beno aktorêko dîyarker o.
Sosyologe Bayara ke ANFyî rê qisey kerd vat ke kurdî prosesanê tewr zehmetan de zî wekîlê xoserî şawitî Meclîsî û ard ziwan: ”Têgêrayîşê kurdan ser ke şaristanan rê vila beno, beno umûmî û vera beno pîlêr. Meseleya kurdan hînî meseleya zereyî ya Tirkîya nîya. Na mesele hînî wayîra dînamîkêkê mîyanneteweyî ya. Coka mumkîn nîyo ke kurdî sîyasetê Tirkîya rê tesîr mekerê. Ganî ma sey têgêrayîşê kurdan pêro prosesanê xo newe ra biercnê û bifikirê ke ‘ma senî eşkenê tîya ra vejîyê.’ ”
Bayare pare kerd ke hêrişê vera kurdan çarçewa plansazîyêke de yenê kerdene û vat: ”No proses bi pêkewtişanê çekdaran, tedayanê polîtîkan û ge ge zî bi prosesanê dejenerasyonî yeno kerdene. Xora yeno xîretkerdene ke Kurdîstan de tedaya şarî bêra kerdene. Kurdan de hişmendîya polîtîke ya xurt est a. Îqtîdarî seba ke na hişmendîye bişiknê pê operasyonan, hêzanê çekdaran û hacetanê cîyayan nê prosesî îdare kenê. Bitaybetî 2015 ra dima ma vînenê ke polîtîkayê dejenerasyonî zêdîyayî. Bitaybetî vera cinî, ciwan û domanan ser o polîtîkayî est ê. Çike taxa kurdan de girseyê tewr dînamîkî nê yê. Dejenerasyonê komelkî û tedaya polîtîk û leşkerîyî tim pîya ameyî caardene.”
Bayare dîyar kerd ke polîtîkayê teda û ecîzkerdişî yê dewlete yewbînan ra cîya nîyê la ge ge nînan ra yew hîna xurtî yeno caardene. Bayare vat: ”Tay wextî aktorê polîtîkî erzîyenê zîndanan. Taxa kurdan arenaya polîtîke ya kurdan weye kena. Kuçeyî nînan, nê zî kuçeyan weye kenê. Coka teda vera kuçeyan zêde ya. Girîng o ke kurdî vera ney xo senî pawenê. Mi çimî de kampanyayê seba ziwanê dayîke nê hetî ra zaf girîng ê.
Kurdî rixmê pêro tedayan zî xîret kenê ke taxa xo payan ser de vindarnê û estbîyayîşê xo bipawê. Kurdî mîyanê nê atmosferê sîyasîyî de zî rojdemî teqîb kenê û ercnenê. Teda çend giran biba zî kurdî tim xo rê rayîrêkî vînenê. Prosesê tecrîd, zîndanan û girseyanê Newroze de ma eşkenê na raştîye bivînê. Partîyê muxalefetî xo mîyan de kurdan nêwazenê. A raşte no hêzê kurdan eşkera keno. Kurdî hînî aktorê dîyarkerî yê. Ma weçînayîşan de eşkenê ney bivînê.”
