Hemsereka Konseya Rayberdişî ya KCKyî Besê Xozate îfade kerd ke qewetê mîyanneteweyî vera hêrişanê tirkîya tewirêk nêmojnenê û vat: “Eke Amerîka biwaza warê hewayî yê Iraqî Tirkîya rê qefilnena la wina nêkena.”
Hemsereka Konseya Rayberdişî ya KCKyî Besê Xozate persanê Yeni Ozgur Politika rê cewab da û rojdem ercna.
Xozate nê cumleyî ardî ziwan: “Tirkîya şerê Ukrayna-Rûsya de hetê NATOyî yanî hetê Ukrayna girewt. Çike Tirkîya qirkerdişê kurdan de hewceyê hetkarîya NATOyî ya. Hetê bînî ra Tirkîya no şer xo rê sey firsendêk dî û hêrişê Zapî kerd. Heta nika Ewropa û Amerîka tewirêk nêmojna nê hêrişan. La nê vera Rûsya cade qisey kerd. No zî dirîyîya Ewropa û Amerîka eşkera keno. Dewleta tirke ha vera gerîlayan çeka kîmyewîye şuxilnena. Senî ke hêrişê vera Rojawanî bi destûrê Amerîka ameyî kerdene, hêrişê vera Başûrî zî bi destûrê Amerîka yenê kerdene. Eke Amerîka biwaza warê hewayî yê Iraqî Tirkîya rê qefilnena la wina nêkena. Çike Amerîka zî wazena ke PKK bêro tasfîyekerdene.”
Xozate îdareyê Bagdatî wina rexne kerd: “Hukmatê Kazimîyî waştişê Tirkîya û PDKyî ser o hêrişê Şingalî keno, mabênê Rojawan-Şingalî de dêsî virazeno û pê têlan gêno. No dês dewamê dêsê mabênê Tirkîya-Rojawanî yo. Hukmatê Kazimîyî pê hêrişê Şingalî hem îdareyê Şingalî rê teda keno hem zî hêrişanê Tirkîya yê vera Başûrî meşrû keno hem zî keno ke îradeyê Şingalî, Asayîşê Êzidxanî, hêzanê YBŞ-YJŞyî teslîm bigêro. Hukmatê Kazimîyî mabênê şarê Iraqî û şarê Şingalî de dişmenîye virazeno la na dişmenîye do zerar bida Iraqî. Êzidîyî 74 reyî raştê fermanî ameyê. Tewr peyêne zî ê raştê fermanê DAIŞî ameyî. Iraq û PDK mesuldarê nê fermanê peyênî yê û ganî hesabê ci bidê. Rexnedayîşê tewr raştikên ê Iraqî şinasnayîşê Îdareyê Xoserî yê Şingalî yo.”
