Cenazeya Bîrsen Karse ya ke Qirkerdişê 19ê Kanûne ra bi hawayêko giran birîndar xelisîya û Almanya de tedawîya rîşa merdimwere dîyêne binê abluqaya seyan polîsan de ardî Cemxaneyê Gazî. Birsene do Goristanê Gazîyî de bêra definkerdene.

20ê Teşrîna verêne de bi seyan tepişteyî semedê protestokerdişê şertê zînandan ê Tîpê Fyî kewtî grevê vêşanîye û înan ra beşêk roja 45. ra dima dest bi rojeyê mergî kerdbi. Hukmat 19ê Kanûne de bi hawayêkê hemwextî zîndanan de operasyon viraşt. Operasyonan de sîlehê giranî û madeyê kîmyayî ameyî şuxulnayîş. Operasyonê vera zîndanan binê nameyê ‘Agêrayîşê Cuye’ de dîya dest pêkerdene û xoverdayaxonê zîndanan rê hêriş ame kerdene. Hêriso ke hetê bi seyan cendirme, polîs, gardîyan û kontrayan ra ame viraştene de 30 tenî ameyî qetilkerdene.

Bîrsen Karse operasyonê 19-22ê Kanûna 2000î ê vera zîndanan sey ‘Operasyonê Agêrayîşê Cuye’ bi name kerdbî. Bîrsena ke Almanya de tedawîya rîşa merdimwere vînayêne dinyaya xo bedelna. Komeleya Komeleya Huqûqnasanê Hemdemî û Baroya Huqûqî ya Şarî dîyar kerdî ke cenazeya Bîrsene ya ke resaya Stenbolî, berdî Dezheyê Tibê Edlî (ATK).

Cenaze teslîmê avukatanê keyeyî ame kerdene

Buroya Huqûqî ya Şarî vat ke cenaze vizêr şew saet 01.00î de teslîmê avûkata keyeyî Seda Şaraldîye ameya kerdene. Buroya Huqûqî ya Şarî da zanayene ke merdimê Bîrsene wexto ke waştî derbazê Cemxaneyî bibî cigêrayîşê sere înan ser de ameyo ferzkerdene û wexto ke şar reaksîyon nîşanê caardişan dayo 20 tenî ameyî destbendkerdene. Ê ke ameyî destbendkerdene berdî Merkezê Polîsan ya Gazî û heta nê saetan aqubetê înan nêame zanayene.

Cenaze do Goristanê Gazîyî de bêra definkerdene

Avûkate Seda Şaraldî ya ÇHDyî vat ke do Bîrsene Goristanê Gazîyî de bêra definkerdene. STENBOL