London, Manchester, Leicester û Edinbourgh de 20ê gulane de seba weçînayîşê serekkomarîye yê Tirkîya raydayîş do dest pêbikero.

Brîtanya de seba raydayîşê turê diyînî mabênê 20 û 24ê gulane de sindoqî do bêrê ronayene. Seba raydayîşî Merkezê Komelê Kurdan, Day-Mer, Federasyonê Elewîyan ê Brîtanya û cemxaneyî ra bêpere weçînitoxî do bêrê berdene bi cayê raydayîşî.

Raydayîş 20ê gulane de saete 08.00 de do dest pêbikero û 24ê gulane de saete 22.00 de biqedo.

Koordînasyonî ra Dogan Gençî ANFyî rê qisey kerd û ard ziwan ke turê diyînî yê weçînayîşê Serekkomarîye de ganî pêro kurdistanij û tirkîyayijî erkê xo bîyarê ca û raya xo bidê.

Hemsereka Merkezê Komelê Kurdan ê Londonî Turkan Budake zî îfade kerd ke ganî şar bêhêvî, bêmoral nêbo, seba qedînayîşê nê rejîmê dîktatorîye têbigêro û heta 20e gulane seferber bibo.

Vervatoxê Merkezê Komelê Kurdan û Tirkan (Day-Mer) Feyzullah Canpolatî vat: “Çar hetanê Brîtanya de raydayîş do bêro kerdene. Ma reyna venga şarê xo danê ke raya xo bido. Seba ke welat dîktatorîye ra bixeliso, ma raya xo bidê û tarîxî binusê.”