Parlamenterê HDPyî yê Antalya Kemal Bulbulî zîyaretê Erdoganî ercna û wina qisey kerd: “Erdogan bi teda û ferzkerdişî, pê keyfê xo şî cemxane, eyar da merdiman û goreyê bawerîya elewîtîye tênêgêra.”

Erdoganî hêrişanê sîstematîkan ra dima cemxaneyêkê Mamakî yê Anqara zîyaret kerdbî. Zîyaret de dêsan ra resimê Hz. Alî wedarîyabî.

Parlamenterê HDPyî yê Antalya Kemal Bulbulî zîyaretê Erdoganî ANFyî rê ercna.

Bulbulî ard ziwan ke tay kesan ‘meşrûtîya zîyaretî’ rexne kerd û vera ney nêrazîbîyayîşê xo mojna. Bululî vat cemxaneyî caran meşrû yê. Bulbulî ard ziwan ke oyo ke meşrû nîyo wedarnayîşê resimanê Hz. Alîyî yo û vat: “Cemxaneyî meşrû yê la qanûno bingeyî meşrû nîyo. Erdogan bi teda û ferzkerdişî, pê keyfê xo şî cemxane, eyar da merdiman û goreyê bawerîya elewîtîye tênêgêra; nê meşrû nîyê. No vera elewîyan sûc o. Ti hem goreyê keyfê xo şinî cayê bawerîya elewîtîye hem zî eyar danî ci. No nêzdîbîyayîşê Erdoganî goreyê Îslamî zî nîyo.”

Bulbulî vist vîrî ke Erdoganî zîyaret de derheqê hêrişanê vera elewîyan de qisey nêkerdo û vat: “Erdoganî seba yew armancî no zîyaret kerd. Çi serekkomar çi padîşah çew nêeşkeno hîna rehet ê meqamî de ronişo. Kişta pîrî de çi gureyê ey esto? O pîr zî pîrê kamyew ocaxî yo? O zî pîr nîyo, beno ke înan o kes camî ra ardo. Tira vanê ‘pîrê cemxaneyî’ la elewîtîye de çîyo winasên çin o. Pîrî pabesteyê ocaxan ê. Cemxaneyan de wexto ke cem gêrîyeno çew nêeşkeno kişta pîrî de ronişo. Serekkomar zî bibo ganî merdim verî wesfanê xo biterikno. Dima eşkeno meqam de ronişo. Reyna elewîyan de ‘akerdişê rojeyî’ çin o. Ma de kesê ke seba rojeyî nanê taybetî virazenê û tira vanê ‘fitar’ sey heramzadeyî pênase benê. Erdogan serî ra heta binî xelat têgêrayo. Xora nê camêrdî cemxaneyî rê ‘cumbuşxane’ vatbî, waştbî pê dozerî cemxaneyan birijno, seba veradîyayîşê kiştoxanê Qirkerdişê Madimakî zî vatbî ‘xêrîn bo.”’