Parlamentera HEDEPî ya Sêrtî Sabahat Erdogan Saritaşe bale ante kampanyaya ‘Jin, Jiyan, Azadî’ û vat ke çar parçeyanê Kurdistanî de ganî yo ke cinîyê yew bibê.

Heyetê Cinîyan o ke Parlamentera HEDEPî ya Sêrtî Sabahat Erdogan Saritaşe, Hemşaredara Silopîya Adalet Çîmen Fîdane, Vervatoxa Têgêrayîşê Cinîyan Gulbahar Guzele, Endama Kongreya Komelê Demokratîkî Neslîhan Acare û Endama Meclîsê Cinîyan ê HEDEPî Gulbahar Aksoye ra yeno pê bi wesîleya 25ê Teşrîna Peyêne Roja Têkoşînê Mîyanneteweyî ya Vera Şîdetê Serê Cinîyan Başûrê Kurdistanî zîyaret kerd.

Saritaşe pare kerd ke cografyaya kurdan de şerêko giran est o û vat: “Tewr zaf cinîyî raştê hêrişan yenê. Seba têkoşînê vera ney ma Kampanyaya ‘Jin, Jiyan, Azadî’ xurt kenê. Felsefeya Jin, Jiyan, Azadî seba pêro cinîyan bîye çimeyê îlhamî. Ma na çarçewe de karanê xo yê rêxistinîye kenê. Ma tîya de zî naye ser o pêvînayîşî kerdî. Çar parçeyanê Kurdistanî de zî dewlete bi heman hawayî nêzdîyê cinîyan ê kurdan benê. Sey cinîyan ê kurdan ma rê lazim o ke çar parçeyanê Kurdistanî de yewîya xo awan bikerê.”

Aktîvîsta Heqanê Cinîyan Gulbahar Guzele îfade kerd ke çarçewa bernameyê 25ê Teşrîna Peyêne de înan tecrubeyê xo cinîyanê Başûrî de pare kerdê û vat: “Ma Vakur de bi têgêrayîşê azadîye xebatê cinîyan dabî destpêkerdene. Ma wazenê nê xebatan 4 parçeyan de zî bikerê û Kampanyaya Jin, Jiyan, Azadî çar parçeyan rê vila bikerê. Başûr de bi taybetî bi hêrişanê vera erjan hêrişê cinîyan yeno kerdene. Na babete de ma temsîlkarîya cinîyan girîng vînenê. Tim yeno vatene ‘meseleya cinîyan.’ No raşt nîyo. Ganî ma vajê ‘meseleya komelî.’ Ma yewbînan ra hêz gênê, paştî danê yewbînan. Ma do nê pêvînayîşan ra zî qetî netîceyanê serkewteyan bigêrê.”