Her cayê Kurdistanî de vera serdestan xoverdayîş dewam keno. Bakurê Kurdistanî de kî çalakîyî qewimîyenê. Kurdî wazenê ke meseleya kurdan cade bêro çareserkerdene û Serekê PKKyî Abdullah Ocalan bireso azadîya xo ya fîzîkî. Na çarçewa de Hemsereka DBPyî û Parlamentera DEM Partî Çîgdem Kiliçgun Uçare rojnameyê ma rê tayê ercnayîşî kerdî.
Uçare reftarê îqtîdarê AKP-MHPyî ser o nîya vat: “Xeylê waxt o ke îqtîdarê AKP û MHPyî destê saran de çik est o wazeno ke bigero. Heqê cinîyan, heqê gencan, heqê kirmancan, heqê karkeran, heqê elewîyan dardê we, rejîmê xo kî serê na neheqîye de viraşt. Kamî ke vengê xo duştê îqtîdarî de kerd berz, rexne kerd, o kerd zerre, waşt ke welat de bibo bevengî. Hetê zura polîtîkaya cengî, hetê zura krîzê aborî, hetê zura bêhuqûqî… Nê xirabîyî her kesî ra bîyî vila. Na rewşa tarî de her kes raya vecîyayîşî fetelîno. Ma ke se kerd, perodayîşê ma beno xirt? Hata nika ma serva xoverdayîşê xo se kerdo, gereko naye ra tepîya çîyêde newe bîkerîme.”
‘Ocalan seba çareserî gurîno’
Uçare bale ante persa kirmancan ser o û nî ercnayîşî kerdî: “Meseleya verêne persa kirmancan a. Serva çareserî gereko pêro pîya bibîme. Saran pêronan kî waşt na mesele hurendîya xo bîvîno, kes nêşîkîno vernî bigero. Ma kî ‘no baro giran neçar nîyo’ vat û vejîyayîme rayraşîyayîşî. Hem îtîqatê ma hem kî estbîyayîşê ma zaf eşkera yo, çareserî teyna destê îqtîdarî de nîya. Serva persa kirmancan kes nêvano ‘çutir yenîme hurendî, nê cengî çutir xelesnenîme’! Hîn vanê ke ‘nîya amo, nîya şero’. Ma kî vanîme ‘nîya amo ema naye ra tepîya neverdanîme hîn şero’. Na mesele de serva xeleşîyayîşî, serva çareserî teyna birêz Ocalan gurîno, fikr keno û proje ano meydan. Nê projeyê çareserî dewlete nêwazena. Keso ke dormeyê nê projeyî de vindeno kî nêwazena. Hîn kena ke hem aşîtî hem azadîya saran hem kî azadîya îtîqatan nêbo. No rayraşîyayîş teyna yê ma nêbî, no rayraşîyayîş serva azadîya pêro saran bî.”
‘Leweyê sima der îme’
Hemsereke Uçare da zanayene ke Rayraşîyayîşê Azadîye de nêzdîbîyayîşê şarî zaf rind bî û nîya vat: “Ma des û ponc rojî Rayraşîyayîşê Azadîye kerd. Her suke de, her navçe de ma sarê xo de ameyîme pêser. Ma şîyîme caye ke tede qetlîam bîyo, şîyîme serê mezelan. Uca de hem yad kerd hem kî mezgê xoverdayîşê xo ard xo vîr ra. Sarê ma ma de domanê xo dîyî, îtîqatê xovardayîşê xo dî, hata nika çutir xoser vindeto, o dî. Sarê ma, ma teyna nêverdayî. Pîya rayraşîyayîşê xo kerd, pîya vengê xo berz kerd. Seserra dîdeyîne de sarê ma nêwazeno onca qetlîam bîvîno, onca zonê xo, estbîyayîşe xo, dîroka xo binê polîtîkaya înkarî de bimanê. Duştê zulmî de xoverdayîşê xo canêverda, vengdayîşê xeleşîyayîşê xo waştêne aştî ra canebî.
Ma sodir rayraşîyayîş kerd, kotî de ke ameyîme pêser uca de nuşteyê birêz Ocalanî wend, son de meyman bîyîme û şîyîme çeyeyê sarê xo. Ma dî ke girêdayîşê sarê ma zaf çîp o, zaf zerre ra wo. Nê des û ponc rojan de ma mezgê xo kerd raya xo, piroşîyîme heqîqatê xo ra, dest dayîme perodayîşê xo ra. Sarê ma, ma rê bî rayber.
Gegane çimê înan kî bîyî pir, gegane yê ma kî bîyî pir. Sarê ma ma ra vat ke ‘raya sima raya xeleşîyayîşî ya. Mevinderê! peyê sîma der îme, leweyê sîma der îme.’”
Îqtîdar demokrasîyî xenekneno
Uçare vat ke rayraşîyayîş de zafane persa kurdan ser o pêvînayîşî kerdî û nîya qisey kerd: “Welat de persa verêne persa kirmancan a. Persa bîne dormeyê nê înkarî de bena eşkera. Kam ke nameyê na perse raşt vano, kam ke serva na perse raye vîneno gereko bizanîme û gereko wayîr bivejîme. Dewlete û îqtîdar rind zanenê ke na perse şîkîna çareser bibo. Çareserîye kî destê birêz Ocalanî de ya û fikrê ey ra yena. Îqtîdarî Îmrali de huqûq guret binê lingane xo, qanûnî dewlete ebe xo nêvirazena. A wazena ke demokrasî, heq, edalet û aştîye Îmrali de bixenekno. Na rewşe, nê xirabîyî hîn bîyê eşkera ke, her ca de vînenîme, her ca de hesnenîme. Ma rayraşîyayîş de hem rewşa welatî qisey kerde, hem perodayîş û xoverdayîşê xo qisey kerd, hem kî azadîya birêz Ocalanî qisey kerde. Se serrî yo, zulmo ke sarê ma dîyo, endî bes o. Persa kirmancan de çareserîya demokratîke hewce kena, paradîgmaya birêz Ocalanî na çareserîye rê bena çever.”
‘Na geym beno, na geym kenîme’
Uçare îfade kerd ke Rayraşîyayîşê Azadîye tarîxî bî û girîngîya nê rayraşîyayîşî nîya ercnaye: “Nê rayraşîyayîşî dîroka ma kirisnaye, arde û kerde ewro. Perodayîşê ewroyî ra, roşt bî. Pêro saran rê raye bî, tengîye ra derman bî. Tecrîdo ke her ca der o, serê ma der o, ma o sikna. Kam ke vano ‘kirmancî çîn ê, persa kirmancan çîn a’, kamî ke se serrî yo înkar kerdo, sûrgin kerdo, raver înan bîvîno. Nê rayraşîyayîşî hem pêropîyabîyayîşê sarê ma musna hem çareserîya demokratîke dîyar kerde hem kî aştîye kamî de bena, çutir bena o eşkera kerd. Sarê ma, dostanê ma vat ke ‘Ma na perse ra çareserîye wazenîme. Kîlîdê çareserî û muxatabê çareserî birêz Ocalan o. Azadîya birêz Ocalanî bîyarê hurendî. Nê vengdayîşî kam ke hesneno, dest bido ma û piştî bido ma. Na geym beno, na geym kenîme.’”
