Cenazaya gerîlayê HPGyî Eyup Çelîkî badê 3 serran dîyaye keyeyê ci û Amed de ameye definkerdene.
Cenazaya gerîlayê HPGyî Eyup Çelîkî (Demhat Cîlo) yo ke 2020 de hêrişê hewayî yê Sêrtî de pîya bi 5 embazanê xo şehîd bîbî, badê 3 serran dîyaye keyeyê ci.
Rixmo ke keyeyê ci 2020 de nimûneya gonî dabî, bê xeberdayîşê keyeyî cenazayê Çelîkî û embazanê ci mezelanê bêkesan de ameyî definkerdene.
Badê DNA ke keyeyî 3 serrî verî gonî dabî, ame qetîkerdene ke cenaza aîdê Çelîkî ya. Naye ser o keye şî Sêrt, mezelanê bêkesan ra cenazaya Çelîkî girewte û arde Amed. Keye rayîr de xeylêk rey “nuqtayanê kontrolî” yê polîs û leşkeran de ame vindarnayene. Cenazaya Çelîkî hetê keyeyê ci ra Goristanê Yenîkoyî yê Rêzanê Amedî de ameye definkerdene.
