Derheqê hêrişê nîjadperestî ke hemverê wendekaranê kurdan ê Unîversîteya Akdenîzî de wanenê ameyo kerdiş de cinîyanê amedijî qisey kerdî û vat: “Hêrişê nîjadperestî û faşîzmo ke yeno kerdiş nêweşî ya û na rewşe zerrîya ma dejnena. Vatişê sîyasetmendaran kesan teşwîqê nîjadperestî keno.”

Kampusê Unîversîteya Akdenîzî de komêke nîjadperestî (30 kesî) hêriş berdî serê 3 wendekarê kurdî yê bi nameyê Botan Artûç, Feyzî Akan û Hatîce Tong û înan bi giranî birîndar kerdibî. Derheqê hêrişê nîjadperestî yê hemverê wendekaranê kurdan de ame kerdiş, cinîyanê Amedî ercnayîş kerdi.

Cinîyan wina cewab dayî persan:

Nebahat Artekin: “Ma bi hizûr nêeşkenê tutanê xo, merdimanê xo bişawê mekteb. Zerrîya ma bi dej a. Çira kesê ke şîdet kerdê nêtepiştê. Ma ê zî merdim nîyê.”

Yildiz Turk: “Heqdar nîyê, çira ciwanan kuwenê. Eke nê hêrişî bibê, ma tutanê xo nêşawenê. Lazim o nîjadperestî nêkerê, nêheqî nêkerê û ganî pay nêdê rûmetî ser. Vanê ke ma wayê û bira yê, ma wayê û biratî wina ya? yê ke baş nêbê ma înan dir ne wayê û ne zî bira yê.”

Nihal Yaşar: “Ma nîjadperestîya ke ameya kerdiş qebul nêkenê. Lazim o sere de ma aya bibê û nê çî tut û derûdorê xo ra vajê. Ganî ma înan zî aya bikerê. Bi nê rengî zî lazim o ma nîjadperestîye ra vajê êdî bes o.”

Rojda Tuna: “Çîyêke ma dejnenê yê. Rewşêka tehluk eû xirab a. Hewil danê ke kurdan çin bikerê. Xeylêk serebûtê sey serê medyaya dîjîtale nînê dîyayîş zî estê.”

Serê persa ma ya, kurd û tirkî wayê û bira yê dir Rojda vat, na cumla vatiş de manena û çi heyf, pratîk de tiştek tune yeçîyêk çin o.”

Ayten Sir: “No hêrişêko nîjadperestîye ke bajarê tirkîya de hemverê kurdan de her tim hêrişê nîjadperestî bîyê. La ganî ma kurdî bibê yew û wayîrê tutanê xo vejîyê.  Heme sîyasetê xo serê ma de kenê. Nê sîyasetî dir zî dişminîyê kurdan kenê û kurdan kenê hedef. Seba ke ê kesê hêrişkar hetgirê înan ê, coka înan nêtepiştê. Bi tu hawa ceza nêdanê înan.”

Kubra Mîntaş: “Xora ma mîyanê dewletêka kirêt de ciwîyenê. Nê serebûtê bi nê rengî, êdî çi heyf normal yenê. Sey wendekarêke problemê ke ez ciwîyena, xeylêk ê, cebê mi de quruşêk çin o. Bi tu hawayî vatişê, ‘Kurd, tirk wayê û bira yê’ ma qebûl nêkenê. Eke no vatiş rast bibîne, do şert û mercê cuya ma zî seyyewbînan bibîne. Ma tîya ra şinê bajaranê tirkîya, bi hawayêke cîya nêzdîyê ma benê. Ma kurd û tirkî têduşt nîyê. Ez her wext kîşte wendekaran, kîşte kurdan û şarê bindestî de ya.”

Melîsa: “Bi faşîzmê xo dir serberz ê û no zî nêzdîbîyayîşêko veradaye yo. Ferq de nîyê ke faşîzim nêweşîyêk o. Zerrîya mi bi înan veşena. Vatişê kesê serê dewlete zî tesîr nê kerdişan û kesan keno û teşwîq kenê. Ez 6 serrî bîya mi xeberanê nê rengî eşnawêtêne û heta nika zî na rewşe dewam kena. Tirkîya de çîyêko nîno vurnayîş o. Kesê ke hêriş zî kerdê bêguman nînê tepiştiş. Vera tepiştişê înan do înan rê xelate bidê.” AMED