Komîsyonê Kultur û Ziwanî yê DEM Partî bernameyê aktîvîte û çalakîyan ê Roja Ziwanê Dayîke ya 21ê Sibate eşkera kerd. Çalakî û aktîvîteyî mabênê 18-21ê sibate de bi şîarê “Dem demê ziwanê kurdkî yo” do bêrê kerdene.

Eşkerayîye de bale ameye antene girîngîya pawitişê ziwanê kurdkî ser û ame vatene ke seba ke kurdkî biba wayîra statuyêkî ganî têkoşîn bêro pîlkerdene.

Eşkerayîye de venga pêro rêxistinan, dezgehan û kurdan dîya ke bi xurtî tewrê çalakî û aktîvîteyanê ziwanê kurdkî bibê û seba pawitişê ziwanê kurdkî cade têbigêrê. Hemvervatoxan venga pêro kesan da ke bi kincanê xo yê tradîsyonelan Roja Ziwanê Dayîke fîraz bikerê.

Bername wina yo:

-18ê sibate de mabênê saetanê 18.00 û 20.00 de pêro keyeyan, kargehan û cayan de ziwanê kurdkî do bêro qiseykerdene, muzîkê kurdkî do bêro goşdarîkerdene û medyaya dîjîtale de vilakerdişê bi kurdkî do bêrê kerdene.

-20ê sibate de saete 21.00 de derheqê ziwanê kurdî de çalakîya hashtagî do bêra kerdene.

-Mabênê 19-21ê sibate de seba ke ziwanê kurdkî bibo wayîrê statuyêkî rayraşîyayîşî do bêrê kerdene, eşkerayîyî do bidîyê û tewr tay 100 hezar vilawekî do bêrê vilakerdene.

-Sere de Amed, Dêrsim, Çewlîg, Wan, Şirnex, Îstanbul, Anqara û Îzmîr xeylêk şaristanan de aktîvîte û çalakîyî do bêrê kerdene.

-Parlamenterê DEM Partî zî Meclîs de bi wesîleya Roja Ziwanê Dayîke aktîvîte û çalakîyan bikerê.