Qezaya Dêrikî ya Qamişloyî hetê dewleta tirke ra dîyaye bombayan ver. 4 kesî dirbetin bîyî. Dirbetinan ra yew ame berdene nêweşxane û uca de şî heqîya xo.
Dewleta tirke bi taybetî mabênê 4-10ê teşrîna verêne de vera Rojawanî hêrişê giranî kerdbî.
Îdareyê Xoserê Rojawanî derheqê sûcanê şerî yê dewleta tirke de raporêk da Neteweyanê Yewbîyayeyan. Rapor de dîya zanayene ke dewleta îşxalkere vera 224 waran 304 hêrişê hewa û erdî kerdê û nê hêrişan de 221 top û çekê giranî û 83 dronî şuxilnayê. Hêrişan de 47 sivîlî şehîd bîyî û 55 sivîlî birîndar bîyî. Hêrişanê vera binawanîye de zeraro madî resa 56 mîlyon dolarî.
Rêxistina Çimdarîya Heqanê Merdiman (HRW) 26ê teşrîna verêne de bi eşkerayîyêke dîyar kerd ke hêrişê dewleta tirke yê vera Rojawanî zerar danê binawanîye, hêrişan ra bi mîlyonan merdimî bê awe û ceyranî manenê.
Eşkerayîye de ame parekerdene ke hêrişan ra 18 îstasyonê awe û 11 santralê ceyranî hînî nêeşkenê bişuxilîyê.
