Dewa Avskerî (Akdemîr) ya qezaya Pêrtagî ya Dêrsimî de şar nêeşkeno pê heywankarîye debara xo bikero. Krîzo ekonomîk tesîrê cuya dewijan keno.
Tirkîya û vakurê Kurdistanî de netîceya polîtîkayanê îqtîdarê AKP-MHPyî krîzo ekonomîk vera beno pîlêr û tesîrê ci benê giranêr.
Dewa Avskerî ya qezaya Pêrtagî ya Dêrsimî de keyeyê Çetînî heywankarîye keno. Keyeyê Çetînî PÎRHA rê qisey kerd û ard ziwan ke wextanê peyênan ra dima ê hînî nêeşkenê pê heywankarîye debara xo bikerê.
Razîye Çetîne pare kerd ke ê nêeşkenê heqê keda xo bigêrê û vat: “Emser her çî zaf vay o. Tirkîya de merdimî mexdûr ê. Emser ma nêeşkayî şiwanêkî bigêrê karî. Çîyêk nêkeweno ma destî. Her çî zaf bîyo vay, deynê ma zaf ê. Ma pê kredîyan payan ser de vindenê. Eke wina şoro ma do pêro heywananê xo biroşê.”
Agca Çetînî zî da zanayene ke vaya simêrî zaf zêdîyaya û vat: “Ma menga gulane de yê la nêeşkenê simêrî bihêrînê. Tim deynê ma est o. Axpînê ma çin o têna heywanê ma est ê. Awe zî bi pere yo. Ma senî debara xo bikerê?”
Sînan Çetînî bale ante ser ke o 27 serrî yo heywankarîye keno û vat: “Sey verî merdimî nêeşkenê pê heywankarîye debara xo bikerê. Ez vana qey naye ra pey merdimî do heywananê xo destî ra vejê.”
