Dêrsim de şaro ke heywankarîye û citkarîye keno rîyê vayîye ra tengayî de yo.

Dêrsim de krîzê ekonomîkî tewr zaf kî maneyê kesanê ke heywankarîye û citkarîye kenê şikit.

Hemwelatîyan ra Mehmet Taçyildizo ke heywankarîye keno vat: ”Mi tim no kar pê keyfî kerdêne la seba ke debir zaf bîyo vay ma nêşîkînîme nê karî bikerîme. Her çî zaf bîyo vay. Dewlete qet hetkarî nêdana. Verî keso ke ju vinceyê herra ci kî bibîyêne na herre ramitêne û pê îdareyê xo kerdêne la nika hinî bîyo ke şar nêşîkîno herra xo biramo. Rîyê krîzî ra mi hûmara heywananê xo kerde kême. Peynîro ke ma roşenîme ci rê biney zem bîyo la debiro ke ma gênîme ci rê hîrlab-çarlab zem bîyo. Ma tim wisar bizyeyî şitî ra kerdêne û alef dayêne ci la seba ke fîyatî vay ê ma emser hema hay şit danîme ci. Bi qala kilme heywankarîya ke ma pê keyfî kerdêne nika ma rê bîya derd û kul.”

Askare Kiliça ke bi serran o heywankarîye kena aye kî rîyê vayîye ra lomeyê xo kerd. Kiliçe ard ziwan ke aye bi rotişê ron û turaqê îdareyê xo kerdêne la seba ke hinî nêşîkîna heywanan weye bikero verî pes û dima ra kî diwarê xo roto û vat têna di mangayî destê ci de mendî. Kiliçe îfade kerd: ”Timûtim her çîyî rê zem beno ez ganî senî heywanan weye bikerî. Bajaran de rewşe xirabêr a. Şar çopî ra nan arê dano. Hinî dewan de kî şar vêşano. Ez mecbur nê wird mangayanê xo kî roşena û şina cayê lajê xo yo ke teberê welatî de yo. Ez zana nê serran ra dima ez nêşîkîna welatê xo ra dûrî de biciwîye la zobîna çareyê mi çîn o.”