Dewa Herdifî ya qezaya Xorxolî ya Çewlîgî de di mengî yo rayîrî nênê akerdene, ceyran nêdîyeno dewe. Dewijan vat: ”Dewa ma serranê 90an de amebî vengkerdene, nika zî qestî ra ceyranê ma birîyeno.”
Dewa Herdifî ya qezaya Xorxolî ya Çewlîgî serranê 90an de hetê dewleta tirke ra amebî vengkerdene. Dewijî serran ra dima agêrayî dewa xo la nika zî tim ceyranê ci birîyeno û rayîrê ci 2 mengî yo anêbenê.
Dewijan ra Mustafa Tetîkî derheqê babete de PÎRHA rê qisey kerd. Tetîko de 2016 de agêrayo dewe îfade kerd ke 7 rojan ceyran nêdîya dewa înan.
Tetîkî vat: ”Seba ke rayîrê ma girewte yê ma zehmetî ancenê. Zimistanan tim rayîrê dewa ma wina girewte yê. Vanê vewrêsî ra rayîrî qefilîyayê la hema mi vewrêsêk nêdî. Ceyran zî qestî ra birîyeno. Ma bi xo vejîyenê dîrekanê ceyranî ser. Rojêke ma xeta ceyranî kontrol kerdêne, ma heta qeza şîyî. A roje vera tay kesan ma rê telefon kerdêne. Wexto ke ma resayî çimeyê mesele nê kesan ma rê vat ke ‘meşorê uca.’ O çax ma fam kerd. Wezîfedarêkê îdareyê ceyranî zî vat ‘Ceyran ma birna. Nika ma do ceyran bidê şima.’
Nika dewe de 30 kesî estê. Seba ke rayîrê dewa ma çin o ma nêeşkenê teşwîqan ra zî îstîfade bikerê. Ê wazenê ma dewe biteriknê, veng bikerê. Nêwazenê komel bi kultur û bawerîya xo biciwîyo.”
Tetîkî pare kerd ke 25 serran înan Îstanbul de zaf zehmetîye ante dima agêrayî dewa xo û vat: ”Nika ez heywankarîye kena. Mi tîya de azadîya xo viste destî. La tîya de zî dewijê ma zehmetî ancenê. Kokimêk esto ke pê makîneya oksîjenî nefes gêno la dewe de ceyran çin o. Ma pê jeneratorî makîna xebitnaye. Ganî nê meseleyî cade çareser bibê.” ÇEWLÎG
