Sereka Komeleya Cinîyan a Rosa Adalet Kaya vat ke Emîne Şenyaşare hînî bîya sembola xoverdayîşî û pare kerd: “No têkoşîn do pêro cinîyan rê bibo mîsal. Ma vera nê zulmî xoverdayîşî pîl bikerê.”

Keyeyê Şenyaşarî verê Edlîyeya Riha de nobeta xo ya edaletî rê dewam keno. Keyeyî vizêr zî ‘Sifreyê Edaletî’ de verê edlîye de fitarê xo kerd. Komeleya Cinîyan a Rosa û Rêxistina HDPyî ya Dîlokî bîyî meymanê Sifreyê Edaletî yê Şenyaşaran.

Sereka Komeleya Cinîyan a Rosa Adalet Kaya fitarî ra verî qisey kerd û îfade kerd ke Emîne Şenyaşare hînî bîya sembola xoverdayîşî. Kaya da zanayene ke ê hê hetê xoverdayîşê Şenyaşaran de yê û vat: “No têkoşîn do pêro cinîyan rê bibo mîsal. Ma vera nê zulmî xoverdayîşî pîl bikerê.”

Hemserekê HDPyî yê Dîlokî Avnî Bînîcîyî zî ard ziwan ke keyeyê Şenyaşarî wazeno ke wa Fadil Şenyaşar bêro veradayene û mesuldarê qirkerdişê nêweşxaneyî bêrê cezakerdene. Bînîcîyî vat: “Ma venga rayaumûmîya demokratîke danê ke seba ke waştişê Şenyaşaran qebul bibê tewrê têkoşînî biba.”