Koordînasyonê Krîzî yê HDPyî ra Mahfuz Guleryuzî ferasetê îqtîdarî yê erdlerzî rexne kerd û vat ke erdlerz qeder nê, cînayet o.

Guleryuzî vat: “Çîyo ke herêmanê erdlerzî de qewimîyeno, îqtîdar cara eqsê nê de qisey keno. Rewşa raşte zaf cîya ya, rewşe xidar a. Cayê ke hema qet hetkarî nêresaya ci est ê. Goreyê telefonanê ke ma rê yenê bi hezaran kesî hema binê rijnayîşî de yê. Çi heyf ke her hele hûmara kesanê ke dinyaya xo bedilnenê, zêdîyena. Mudaxaleyî qîm nêkenê. Şar binê rijnayîşî de qederê xo rê ameyo caverdayene. Ma vînenê ke xebata AFADî nêvejana.

Ma pîya bi yewîyanê koordînasyonî, heyetî şawitî herêmanê erdlerzî û hetkarî organîze kerde. Ma lîsteyê hewcedarîyanê lezebezî medyaya sanale ra vila kerdî û pîya bi şarê xo torrê paştîdayîşî nayî ro. Hem teber hem zerreyê welatî ra hetkarî yena. Heta nika bi seyan tir, kamyon û kamyonetê hetkarî resayê waranê erdlerzî, yan zî tay mendo biresê ci. War de hendê 2 hezar kesan zerrîwazê ma estê. Îqtîdar nêwazeno çew hetkarî bikero û bi xo zî heqê nê karî ra nîno. Ma eşkera vajê ke îqtîdar binê rijnayîşî de mend. Îqtîdar mergan sey qederî hesibneno û eşkerayîyanê xo de şarî rê gefî waneno. Tecrubeyanê dinya ra ma dî ke; afatê xozayîyî qeder nîyê.”

Guleryuzî qiseykerdişê xo rê wina dewam kerd: “Bacê erdlerzî çarçur kerdî, goş nêda merdimanê zanîstî û tedbîrî nêgirewtî. Îxaleyê înşîatî dayî merdimanê xo, cayo ke vat nêbeno de bînayî viraştî, mîlyar dolarî semedê şerî xerc kerdî, wextê rijnayîşî de binate ra bîyî vînî, cayanê kombîyayîşî yê erdlerzî de AVMyî viraştî, no qeder o? Nê! no qeder nê, cînayet o.

Ma cehd kenê ke wa hînî çew memiro, ma pê xurtkerdişê paştîdayîşî nê rojanê tarîyan xo dima verdê. Ma pêro pîya eşkenê na derbe bipêşê. Merdimî qederê xo rê ameyî caverdayene, fehmê merkezperestî rijîya, ma pê paştîdayîşê komelkî derban pêşenê.

Nika problemo tewr pîl cayêmendişî yo, vêşanîye ya. Çi heyf ke vizêrna hînî problemê arêdayîşê cenazayan est o. Şar serê rijnayîşan de semedê xelisnayîşê merdimanê xo paweno. Makîneyî karî, ekîpmanê teknîkî hewce kenê. Çîyo ke destê ma ra yeno ma kenê. Ma pîya bi dezgehanê komelê sîvîlî û partîyanê sîyasîyan ê bînan nê karî kenê. TMMOB, KESK, DİSK û şaredarîyê cîyayî war de yê û ma kenê înan reyde na xebate koordîne bikerê.”