Endama Heyetê Rayberdişê Merkezî yê HDPyî Ozlem Gunduze dîyar kerd ke eke HDP sîyasetî ra bêro menkerdene amadekarîya înan esta û wina qisey kerd: “Ma do qetî şarê xo bêtercîh meverdê.”
Endama Heyetê Rayberdişê Merkezî yê HDPyî Ozlem Gunduze cewab da persanê ANFyî û hêrişê vera partîya înan, dewaya qefilnayîşî ercnayî.
Ozlem Gunduze da zanayene ke weçînayîşan de HDP hêzo dîyarker o û pêro hesabî coka HDPyî ser o yenê kerdene. Gunduze vat: “Êyê ke qefilnayîşê HDPyî ser o hesabê weçînayîşan kenê, hêzê HDPyî nêvînenê û do peynî de bi giranî xelet vejîyê. Îtîfaqê Kede û Azadîye do weçînayîşan de rolê kilîdî kay bikero. Îqtîdar seba ke HDPyî teberê sîyaset û weçînayîşan de verbido dewaya qefilnayîşî viste dewre. Na dewa seba tasfîyekerdişê HDPyî hemleya îqtîdarî ya. La ma vera na hemle xebatanê xo rê dewam kenê. Na dewa qetî tesîrê tempo û moralê ma nêkerd. Eke partîya ma bêra qefilnayene zî amadekarîyê ma est ê. Beno ke ma ra tay kesî sîyasetî ra bêrê menkerdene la ma do ê bînan reyde rayraşîyayîşê xo rê do dewam bikerê. Ma do qetî şarê xo bêtercîh meverdê.”
Ozlem Gunduze îfade kerd ke bedelê tecrîdê vera Rayberê Şarê Kurdî Abdullah Ocalanî pêro şarî danê û vat: “Tecrîd û çaresernêkerdişê meseleyê kurdan ra Tirkîya demokratîk nêbena. Îqtîdarî hêrişê ma kerd la raştê xoverdayîşêkê pîlî ame. A raşte dewaya qefilnayîşê HDPyî zî çaresernêkerdişê meseleyê kurdan de israr o. Key partîyê ma ameybî qefilnayene kurdî hîna bihêz rêxistin bîyî. Netîceya na dewa se bena wa biba ma do pê demokrasî welatî tacîdar bikerê.”
