Qezaya Hêne ya Amedî de 11ê adare de mabênê keyeyan de lejo çekdar vejîya û 2 kesî merdî. Vizêrî şewe 5 banî dîyayî adirê ver.
Taxa Miqirîyo ya Qezaya Hêne ya Amedî de 11ê adare de mabênê di keyeyan de lejo çekdar vejîya. Sebebê ci hema dîyar nîyo. Lej de Muzaffer Kaya û lajê ci Necmettîn Kayayî dirbetîya girane girewte. Badê ke ê ameyî berdene nêweşxane, uca de merdî. Serebût de 2 kesê ke nameyê ci nêno zanayene, raştê guleyan ameyî û dirbetin bîyî.
Lejî ra dima vizêrî şewe 5 banî yê ke aîdê keyeyan ra yew bîyî, dîyayî adirî ver. Roniştoxanê taxe îxbar da, cendirme û ekîbê îtfaîya ameyî sewqkerdene cayê serebûtî. Tayê kesê ke têkildarê nê serebûtî bîyî seba ke îfadeyê ci bêrê girewtene ameyî berdene qerekol.
