Seke zanîyeno tepişteyê sîyasî seba şikitişê tecrîdî, azadîya fîzîkî û şertanê xirabîyan ê zîndanan grevê vêşanîye de yê û keyeyê înan zî teber de Nobeta Edaletî de yê. Seba azadîya Serekê PKKyî Abdullah Ocalanî û çareserîya meseleya kurdan şaristananê Vakurê Kurdistanî de di baskan ra Rayraşîyayîşê Azadîye yo Pîl û çalakîyê cîya cîyayî yenê kerdene.
Derheqê babeta 15ê Sibate û Rayraşîyayîşê Azadîye de Parlementerê DEM Partî yê Çewlîgî Omer Faruk Hulaku ercnayîş kerd.
Hulaku destpêkê qiseykerdişê xo de bale ante serê çalakîyanê Vakurê Kurdistanî û Rayraşîyayîşê Azadîye û vat: “Sere de Birêz Abdullah Ocalan û heme şaro kurd, heme şarê ke na cografya de ciwîyenê yenê tecrîdkerdiş. Îqtîdarî hetê aştî û demokrasîye de pratîkêk nîşan nêda û dest bi konseptê şerî kerd. Tam zî na nuqta de kewtî mîyanê fikrê do pêşnîyazê çareserî yê aştîyane û demokratîke peynîya îqtîdarê înan bîyaro. Coka ra girawa Îmraliyî de muracatê tecrîdêkê mutleqî kerd. Çimkî polîtîkaya xo serê esasanê xirabîyan awan kenî. Na cografya de her kes hetê aştî û demokrasîye de yo. Qet şik çinî yo. Ma têkoşînê xo ra gamêke tepîya nêerzenê. Ma do xeyalê kesê ke aştî, azadî û demokrasî wazenê bîyarî ca. Ma bi nê hêvîyan rayraşîyayîşê xo da destpêkerdiş û bi nê hêvîyan dewam keno. Heta bawer kenê ke waştişê xo yê heqan, aştî, azadî û demokrasîye dest bifînî û rayraşîyayîşê xo peynî bikerî.”
Hulakuyî dewamê qiseykerdişê xo de tecrîdê serê şarî û tedaya serê çapemenîya azade û vat: “Rayîro ke ma bi talebê aştî û demokrasîye kewtî rayîr do bi paştîdayîşê şarî peynî bibo. Wa bawerîya her kesî bi nê bibo û wa hetê paştîdayîşî de tepîya nêvindo. Ma do pîya biresî peynî. Ma do tecrîdî bi îradeyêkê rêxistinkerde birijnî. Vakurê Kurdistanî û Tirkîya de her kes binê tecrîdî de yo. Tu kes azad nîyo. Heta hetgirê îqtîdarî zî. Çapemenî binê tecrîdî de ya, çimkî dewlete ferz kena ke şar mîyanê têkilî de nêbo. Kedkarî mehkumê vêşanîye ameyî kerdiş. Çimkî heme çimeyî mabênê kardayoxan de yenê paykerdiş. Keso ke vêşanîye anî ziwan, ya erzîyeno zîndanan ya zî bi terorîzekerdişî têna yeno verdayîş. Heme heqê kedkar, teqawit, wendekar, domanan û cinîyan ameyê xespkerdiş. Ma semedê şikitişê tarîtîya tecrîdî kewtî rayîr.”
Hulakuyî qala xoverdayîşê zîndanan zî kerd û vat: “Zîndanan de tecrîdêko mutlaq est o. Tepişteyî vera tecrîdê mutlaqî, îşkence û tedaye de xover danî. Ma xoverdayîşê tepişteyan silam kenî. Mesajêkê înan o muhîm est o; kam cû şertan de bibo zî xoverdayîş û qerardarî do merdimi biresno serkewtiş. Her ca semedê ma raşteyê xoverdayîşî yo.”
Hulakuyî tewr peynî vat: “Bi bawerîya Rayraşîyayîşê Azadîye ke ma 1ê sibate de da dest pêkerdene, xoverdayîşê zîndanan, Nobeta Edaletî ya dadîyan, têkoşînê azadî û edaletî yê Dadîyê Aştîye û bi bawerîya aştî û demokrasîye ya şaran do komployê 15ê Sibate roşn bibo. Sere de do tecrîd biqedîyo, dima ra zî do Birêz Ocalan bireso azadîya xo ya fîzîkî. Bi na bawerîye û qerardarîye rayraşîyayîşê xo dewam kenî.”
