Îdareyê Xoserî yê Rojawanî vera hêrişanê dewleta tirke hêzê mîyanneteweyî rexne kerdî û eşkerayîyêka winayêne daye: “Hêrişê îşxalî do raştê xoverdayîşê yewbîyayeyî yê şaranê ma bêrê.”

Îdareyê Xoserî yê Rojawanî derheqê hêrişanê dewleta tirke yê vera Rojawanî de eşkerayîyêka nuştekîye daye.

Îdareyê Xoserî eşkerayîya xo de wina vat: “Dewleta tirke bi hawayêkê plankerdeyî hêrişê herêma ma kena. Bi droneyanê çekdaran şarê herême kena hedef. Netîceya nê hêrişan de sîvîlî şehîd benê, binawanîya herême wêran bena. Vera nê hêrişan bêvengîyêka mîyannetewe esta. Nê hêrişê dewleta tirke vera ma û vera pêro şaranê Sûrîye yenê kerdene. Bêvengîya Rûsya, koalîsyon û hêzanê bînan ê Sûrîye şikî virazenê ke no tehlukeyêko pîl o û do alozîye giranêr bikero.

Ma venga pêro terefan danê ke mudaxeleyê hêrişanê Tirkîya bikerê. Armancê nê hêrişanê dewleta tirke hîrakerdişê waranê îşxalkerdeyan o. Naye ra zêdeyêr nê hêrişî destekêkê pîlî danê DAIŞî. Hêrişê îşxalî do raştê xoverdayîşê yewbîyayeyî yê şaranê ma bêrê, şarê ma do pêro îmkananê xo, xo ver bidê ke herême, dezgeh û destkewteyanê xo bipawê.”