Hemserekanê Meclîsê Kantonê Şehba derheqê hêrişanê Tirkîya de qisey kerd û wina vat: “Ma do nika ra pey zî bi Modelê Îdareyê Xoserî yê Rojawanî xo ver bidê, serkewtişanê pîlan bivisnê destî û dişmenî çin bikerê.”
Şehba 2016 de bi xoverdayîşêkê pîlî yê şerwananê QSD, YPG û YPJyî destê cerganê El Nûsra û DAIŞî ra amebî xelisnayene. 7ê tebaxa 2017î de Şehba sey kantonêkî ameye îlankerdene û game bi game sîstemê xo naro.
Hemserekanê Meclîsê Kantonê Şehba Werdê Şêxo û Cuma Kaloyî derheqê rewşe, hêrişanê peyênan ê vera Şehba de ANFyî rê qisey kerd.
Hemserek Cuma Kaloyî ard ziwan ke sînorê Tirkîya nêzdîyê Şehba yo, coka dewleta tirke tim xîret kerd ke pê ajanan û mudaxeleyan verê averşîyayîşê Şehba bigêra la şarî vera ney xo rêxistin kerdo. Kaloyî vat: “Dima ke şarê Efrînî zî koçê Şehba kerd ma newe ra meclîsê xo awan kerd. Şehba de 4 qezayî estê û nê qezayî pê sîstemê xo îdare benê. Ma do nika ra pey zî bi Modelê Îdareyê Xoserî yê Rojawanî xo ver bidê, serkewtişanê pîlan bivisnê destî û dişmenî çin bikerê.”
Hemsereke Werdê Şêxo zî pare kerd ke wextê rejîmê Baasî û DAIŞî de cinîyî raştê teda û zorbazîye ameyê la dima ke herême ameya xelisnayene cinîyan zî her ca de erkêk girewto xo ser, keyeyê ra vejîyayê teber. Werdê vat: “Cinîyî mîyanê komun, meclîs û dezgehanê bînan de ca gênê. Ma şorişî reyde xo hîna zaf şinasna û fam kerd ke azadîye çita ya. Ma do seba azadîye û destkewteyanê xo hîna zaf bixebitê û tewrê şorişî bibê. Ma do şorişî reyde ser bikewê û pêro cinîyan zî azad bikerê.”
