Platforma Sendîkayên Karkerên Giştî (KESK) li parka Hazalê ya navçeya Bajarê Nû ji bo KHK’î yên ku ji karên xwe hatibûn dûr xistin daxuyaniyek da. Di daxuyaniyê de Şaxa EGÎTÎM-SEN’ê ya Amedê û TUM-BEL-SEN jî di navde gelek kes li wir amade bûn. Di daxuyaniyê de pankarta “Dê KHK’î biçin em ê bimînin” hatin vekirin. Ji aliyê gelek kesan ve dirûşmên “Bijî berxwedana kedkaran” û “Dê KHK’î biçin em ê bimînin” hatin berzkirin.
Di destpêkê de Seroka Giştî ya EGÎTÎM-SEN’ê ya Şaxa Amedê Necla Kûrûl axivî, di axaftina xwe de bal kişand ser rewşa kesên ku bi biryara KHK’ê ji karê xwe hatine dûrxistin ev tişt anî ziman û got: “Em ê ji bo hevalên me yên ku bi biryara KHK’ê ji karê xwe hatine dûrxistin heta biçin ser karê xwe têkoşîna xwe bidomînin. Ev îxracên ku tên kirin êdî bûne wekî biryara OHAL’ê û êdî bûye wek ferzîyekî. OHAL’ê wergerandine rejîmeke kêfî. Ev rejîm kesên ku bi salan ji bo mefên xwe têkoşiyan û mefê wan ji destê wan hat sitendin.”
‘Dawî li polîtîkayên xwe yên şaş bînin’
Hevserokê TUM-BEL-SEN’ê Mehmet Candar destnîşan kir ku dê KHK biçe û ew ê bimînin. Candar got ku ev pergal her tim bi awayekî bê hiqûqî gelek zirarê daye civakê û ev tişt anî ziman: “Dê KHK biçe, em ê qezenc bikin, ev pergala kapîtalîst her tim bi awayekî bê hiqûqî û bê qanûn dixwaze ku zirarê bide xweza, ajal, û mirovan. Desthilata heyî herkesî ji mafê wan ê ku li hemû deveran hebû ji destê wan sitend û ji xwe re kir wekî mal. Em dibînin ku ev polîtîkayên şaş civakê ber bi xizanî û tunebûnê ve dibin. kiryarên wan ên şaş hemû civakê xistine nava gelek zor û zehmetiyan. Em êdî dixwazin ku ev pergala heyî dawî li hemû polîtîkayên xwe yên şaş bîne.”
‘Ev pergal ji mirovahiyê hatiye dûrxistin’
Candar axaftina xwe bi van gotina bi dawî kir û wiha got: “Pergala ku ji mirovahiyê dûr ketiye gelek xesarên mezin dide mafê zindiyan û gelek kesan ji mafên wan ê jiyanê bêpar dike. Desthilata heyî bi têkiliyên xwe yên şaş ku bi neteweyên cuda re datîne, dikeve nava gelek xetereyan û hemû zehmetiyên wan jî civak dikşîne. Li welatê me krîza siyasî, aborî, civakî, birokrasî û hiqûqî heye û hemû jî gelekî zêde bûne.”
