Sereka Komeleya Paştdayîşê Cinîyan a Yenîgune Çagla Yolaşan vist vîrî ke di serrî yo Gulîstan Dokuye ra xebere nêna girewtene û tehqîqat de gamêke nêerzîyaye. Çagla wiseykerdişê xo de vat ke no kişîyayîş û mergê şikdarî yê cinîyan ra cîya nîyo.
Îqtîdarê AKP-MHPyî pê şerê taybetî wazeno şexsê cinîyan de komelî teslîm bigêro. Goreyê doneyanê Platformê ‘Ma do verê kişîyayîşê cinîyan bigêrê’ emser 217 cinîyî bi hawayêkê şikdarî merdî û 280 cinîyî kişîyayî.
Cînayetanê vera cinîyan de dewlete camêrdan pawena. Çawişo pispor Musa Orhano ke Îpek Ere qetil kerd, çawişo pispor Alî Dalgirano ke Surme Înce qetil kerd, gardîyan Halîl Îbrahîm Serto ke Wan de bi wesayîtî Dîlan Toptaşe qetil kerd, polîs Ercan Uysalaro ke cinîyêke rê fuhuş ferz kerd, Zainal Abarakov û babîyê ci polîs Engîn Y. yê ke mesuldarê vînîbîyayîşê Gulîstan Dokuye yê hema zî serbest ê û derheqê înan de birêke nêdîyaye.
5ê çeleyê 2020î ra nata wendekara Unîversîteya Munzurî Gulîstan Dokuye ra xeberêke nêna girewtene. Rixmo ke serebûtî di serrî xo pey de verdayî Serdozgerîya Komare ya Dêrsimî derheqê tehqîqatî de gamêke nêeşte. Rêxistinanê komelê sivîlî û keyeyê Dokuye bale ante ‘kiştişê plankerdeyî’ ser û ê wazenê ke tehqîqat bi nê hawayî bêro kerdene. La sere de dozgerî, temsîlkarê dezgehanê fermmîyan giranîye danê îdîayanê ‘xokiştişî’ ser. Rixmo ke vînîbîyayîşê ci ra rojêke verî Zainal Abarakovî reyde nîqaşêk kerdbi, no çi hetê kamerayan ra qeyd bibi, keyeyê Abarakovî de cigêrayîş nêame kerdene û o nêame destbendkerdene. Destûr nêdîya ke o keyeyê xo bihewilno.
Serekê Komeleya Paştdayîşê Cinîyan a Yenîgune Çagla Yolaşan pare kerd ke mergê şikdarî yê cinîyan û kişîyayîşê cinîyan zaf manenê pê û vat: “Peyê nê kerdişan de camêrdî estê ke tim pawîyenê. Hem kiştişê cinîyan hem zî mîyankerdiş û pawitişê kerdoxan heman çimeyî ra yenê. Serebûtê Gulîstane Doku nînan ra cîya nîyo.” DÊRSIM
