Îro li paytexta Lubnanê Beyrûtê, ji bo nîqaşkirina Komploya Navneteweyî ya li dijî Rêberê PKK’ê Abdullah Ocalan, pirsgirêkên li Rojhilata Navîn û rêbazên çareserkirina wan, ‘Komxebata Bi hev re ji bo Rojhilata Navîn a demokratîk-rêya aştiyê’ tê lidarxistin.

Komxebatê bi sirûda nîştimanî ya Lubnanê dest pê kir, piştre der barê şer, alozî, şoreş, zordarî û gendeliya li Rojhilata Navîn de dîmenek hat nîşandan.

Piştre sekreterê giştî û damezirînerê Kongreya Federal a Daîm a Lubnanê Alfred Riachi axaftina destpêkê kir. Riachi got: “Ji bo ku aştî li Rojhilata Navîn pêk were, divê demokrasî pêk were.”

Alfred Riachi wiha domand: “Em formeke kollektîf û wekhev di navbera hemû beşên civakê de pêşkêş dikin. Em ne cudaxwaz in û parçebûnê naxwazin, em azadîxwaz in. Em azad ji dayik bûn, azad dijîn û em ê azad bimirin.”

Serokê Partiya Sosyalîst a Misirê Ehmed Behaeddîn Şaban jî axivî û daxwaza yekitiya herêma Rojhilata Navîn kir û têkildarî baweriya bi Amerîkayê hişyarî da.

Şaban anî ziman ku di doza Ocalan de her kesî kêmasî kiriye û got: “Çawa ku me azadiya Nelson Mandela pêk anî, divê her kes ji bo azadiya Ocalan a fîzîkî jî bibe yek.”

Piştî axaftinan, rûniştina yekemîn a bi sernavê “Aloziya global, sedem û encamên wê, bandorên aloziyê li Rojhilata Navîn û Bakurê Afrîkayê, bandora aloziyê li Lubnanê, rêbazên çareseriyê, doza rêveberiyê li Rojhilata Navîn” dest pê kir.

Rûniştin ji aliyê Zeyd El Eyûbî ve tê birêvebirin û tê de Yûsif Selame, Reşa Îtanî, Kemîl Şemûn, Êlî Ebû Ewn û Foza Yûsif diaxivin.