Konferansê ‘Ma Dinyaya Xo Apey Wazenê’ ke tede fikrê Rayberê Şarê Kurdî Abdullah Ocalanî yenê nîqaşkerdene, Hamburg de dewam keno.
Konferansî vizêr startê xo dabî. Konferansê vizêrênî de Vervatoxa Meclîsê Cinîyan ê Kurdan ê Hamburgî Leyla Kaya hêverî qisey kerd. Dima nameyê Yewîya Wendekaran a Unîversîteya Hamburgî ser o Luis Dechowî qisey kerd. Dechowî vist vîrî ke waştişê Tirkîya ser o Unîversîteya Hamburgî nêverda konferans uca de bêro kerdene.
Komîteya Amadekarîye û Vervatoxanê Xîretê Ocalanî rê Azadîye ra Reimer Heiderî qiseykerdişê xo de, qedexeyê vera PKKyî rexne kerd û vat ke PKK rêxistinêka terorî nîya rêxistinêka têkoşînê azadîye ya.
Edebîyatkarê îskoçî James Kelmanî peynîya roja verêne ya konferansî de qisey kerd û da zanayene ke bi hezaran kurdî fikranê xo ra semed zîndanan de yê. Kelmanî vist vîrî ke teyna Abdullah Ocalan nê kesê sey şaîr Îlham Samî Çomakî bi serran o tepişîyenê. Kelmanî pare kerd ke hêzê globalî nêverdenê tecrîdê vera Ocalanî bêro wedaritene.
Konferans roja diyine de dewam keno. Salona konferansî pê alayanê YPG û YPJyî, pankarta ‘jin, jiyan, azadî’ û fotografê Rayberê Şarê Kurdî Abdullah Ocalanî xemilîyaye. Bi taybetî medyaya mîyanneteweyîye zaf eleqe mojnena konferansî. Parlamentera HDPyî ya Mêrdînî Ebru Gunaye, Parlamentero verên ê HDPyî Hatîp Dîcle û xeylêk temsîlkarê dezgeh û rêxistinan tewrê konferansî bîyî.
