Kongreya Înşa ya Dêrsimî derheqê qirkerdişê Madimakî de eşkerayîye daye û vat: “Qirkerdişê Madimakî sûcê merdimîye yo û nêbeno ke dewaya ci bêra betalkerdene.”
2ê temmuza 1993yî de Otêla Madimakî ya Sêwasî de nuştox û hunermendî tede 33 kesî ameybî qetilkerdene. Kongreya Înşa ya Dêrsimî serrgêra qirkerdişî de eşkerayîyêke weşanaye.
Eşkerayîye de ame parekerdene ke Qirkerdişê Madimakî sûcanê dewleta tirke yê vera kurdan, elewîyan û hêzanê demokratîkan ra yew o û vat: “9 serrî verî dewlete qestî ra dewaya Qirkerdişê Madimakî verdaye ke wa wextê ci derbaz bibo û bi nê hawayî zî kiştoxî pawitî. Nê kesan bi asanî waranê girîngan ê dewlete de ca girewt, înan rê erk ame dayene. Nînan ra tay kesî bîyî şaredar, tay kesî zî bîyî wekîl. Bi nê hawayî xelate dîyaye înan.”
Eşkerayîye de dîya zanayene ke dîktatorîya AKP-MHPyî bi îşxalê Kurdistanî qirkerdişê kurdan û elewîyan rê dewam kena. Kongre eşkerayîya xo de ard ziwan ke seke Qirkerdişê Madimakî de qewimîya vera kurdan nika çeka kîmyewîye şuxilîyena û heman sûc yeno kerdene.
Kongre vat: “Tek rayîrê vergirewtişê qirkerdişan û tek rayîrê hesabpersayîşî berzkerdişê têkoşînê rêxistinbîyayeyî yo. Qirkerdişê Madimakî sûcê merdimîye yo û nêbeno ke dewaya ci derbazbîyayîşê wextî ra bêra betalkerdene. Ma reyna anê ziwan ke heta ma nêvajê qedîyaya na dewa do qetî nêqeda.”
Eşkerayîye de 33 kesê ke Otêla Madimakî de ameyî qirkerdene, ameyî yadkerdene û hişmendîya faşîste ya dewleta tirke ameye şermezarkerdene.
