Îdareyê Xoserî yê Rojawanî ra Bedran Çiya Kurdî ard ziwan ke mabênê Anqara û Şamî de peymane esta û wina vat: “Yeno waştene ke herêmê îşxalkerdeyî û dormeyê ci reyna debikewê binê kontrolê DAÎŞî. Ma rewşêka cidîye de têrî yê.”

Hemserekê Dayîreyê Têkilîyanê Teberî yê Îdareyê Xoserî yê Rojawanî Bedran Çiya Kurdî derheqê têgêrayîşê cerganê Heyet  Tehrîr El Şamî û plananê Tirkîya de ANFyî rê qisey kerd.

Çiya Kurdî pare kerd ke serebûtê herême bi taybetî ê Efrînî hîra û pirhetî yê û vat: “Seba ke cergê Heyet Tehrîr El Şamî vera QSDyî şer bikerê peymane û gefê rejîmê Sûrîye estê. No senaryo sey parçeyêkê peymana mabênê Anqara û Şamî yo. No plan bi peymana Anqara û Şamî ameyo amadekerdene. Seba tasfîyeya komanê qijan zî pêkerdiş çin o. Yeno waştene ke herêmê îşxalkerdeyî û dormeyê înan reyna debikewê binê kontrolê DAÎŞî. Ma rewşêka cidîye de têrî yê. Ma projeyê vurnayîşê demografî, qirkerdişî û îşxalî yê dewleta tirke de têrî yê. Bêvengîya hêzanê mîyanneteweyîyan û herêmîyan zî tesdîqê înan eşkera kena.

Ma vatbî ke Tikîya seba nêzdîbîyayîşê rejîmê Şamî planêk amade kerdo. Cergê Ehrar El Şarqiye lîsteya rêxistinanê terorî de cagênê rixmê ney zî dewleta tirke paştî daye înan. Tirkîya xora goş nêdana peymanan û huqûqê mîyanneteweyî. Heta ke dewleta tirke paştî bida cergan ma do tim tehlukeyan de têrî bibê. Seba her kesî çîyo tewr hol qedînayîşê îşxalê dewleta tirke yo. A raşt nê polîtîkayî rojêke do bibê belaya sereyê dewleta tirke zî.”