Dezgehê Tibê Edlîyî ke par vat Makbule Ozere nêeşkena zîndan de bimano, serrêke dima vato a eşkena zîndan de bimano.
Qezaya Artemêtî ya Wanî de 9ê gulana 2022yî de Makbule Ozere (81) bi îdîaya ‘”hetkarîya rêxistine” bi cezaya 2 serran û 1 menge ameye tepiştene. Cezaya Ozere serrêke ameye peydeeştene û 7ê êlula 2022yî de ameye serbest veradayene. Dezgehê Tibê Edlîyî (ATK) raporê eşkena zîndan de bimano da. Naye ser o Makbule Ozere newe ra kewna zîndan.
Serdozgerîya Komare ya Wanî seba ke cezaya ke serrêke peyde eşta yewna serre peyde bierzo newe ra raporê ATKyî waşt. ATKyî na rey raporê “Eşkena zîndan de bimano” da Makbule Ozere. Naye ser o rayîrê zîndanî ame akerdene.
Bado ke raporê verênî serî ra serrêke ravîyarte ATKyî qey wina yew rapor da. Raporê 5ê êlula 2022yî yê ATKyî de wina amebî vatene “Eke tedawî mebo, rîskê şikyayîşê esteyî est o, seba ke serê ci zî şîyî dîyar, rîsk est o.” Rapor de reyna qala astimî zî ameybî kerdene. Eynî raporî de amebî vatene ke Makbule Ozere têna nêeşkena miqatê xo bibo coka qerarê nêeşkena zîndan de bimano amebî girewtene. ATKyî badê serrêke rapor bedilna.
Raporê Dezgehê Tibê Edlîyî yê 1ê teşrîna peyêne ya 2023yî de yeno vatene ke wird linganê Makbule Ozere de problemî est ê, coka nêeşkena linganê xo ser pay vindero, wird goşê ci zî bîyî giran, nêweşîya astîmî tede est a. Rixmo ke goreyê raporê verênî çîyo cîya tede çîn o zî ame vatene ke a eşkena zîndanê tîpê Ryî de bimano û badê 3 aşman do newe ra raporê weşîye bêro girewtene.
Hetê bînî ra parlamenteranê HEDEPî semedê Makbule Ozere muracatê Komîsyonê Cipersayîşî yê Heqanê Merdiman ê Meclîsî kerd. Parlamenteran vat Makbule Ozera ke nêweş û kokim a nêeşkena zîndan de bimano û waşt wa huqûq bêro caardene.
