Rêxistina Meclisa Ciwanan a Partiya Wekhevî û Demokrasiyê ya Gelan (HEDEP) a Amedê beriya 1’emîn Kongreya xwe ya Asayî bi dirûşma “Vejîneke ciwan” li dar bixe, li navçeya Sûrê ya Amedê konser li dar xistin. Di konserê de parlamenterên HEDEP’ê Berîtan Guneş, Omer Ocalan, Hevserokên HEDEP’ê yên Amedê Pinar Sakik Tekîn û Abbas Şahîn, Hevserokên Partiya Herêmên Demokratîk (DBP) yên Amedê Sûltan Yaray û Mehmet Şîrîn Gurbuz, Komeleya Piştevanî Yekitî û Çandê ya bi Malbatên Xizmên Xwe li Dergûşa Mirovahiyê Windakirine (MEBYA-DER), Tevgera Jinên Azad (TJA), Şandeya Dayikên Aştiyê amade bûn. Li salona konserê pankarta “Vejînek Ciwan” daliqandin. Ji bo kesên ku di têkoşîna azadiyê de jiyana xwe ji dest dane deqeyekê rêz gitin. Piştî rêzgirtinê parlementera HEDEP’ê Berîtan Guneş axaftinek kurt kir û got: “Me bi ciwan tî dest pê kirî ye, em ê bi ciwantî bi ser bikevin.” Parlementerê HEDEP’ê Omer Ocalan jî diyar kir ku dewleta tirk armanc dike ku pêşî li xeta azadiyê bigire û got: “Dema di têkoşîna siyaseta Kurdistanê de sekna ruhê ciwanan germ dibe, têkoşîn li pêş dikeve. Bi salan e em têkoşîneke mezin dimeşînin. Di têkoşîna me de cihê ciwan û jinan pir girîng e. Em dizanin ku dema ciwan û jin di siyasetê de rol û mîsyonên xwe bilîzin em ê li pêş bikevin.
Ev der Kurdistan e
Ger ciwan rol û mîsyona xwe nelîzin, wê siyaseta me derbasî xeteke azadîxwaz nebe. Ji bo têkoşînê asteng bikin dixwazin tirsê bixin nava ciwanan. Lê ev der Kurdistan e. Ciwanên me bi salan li vir têkoşiyan û liberxwedan. Ew bi tang û topên xwe hatin ser vê axê, lê nikarîn ciwanên me teslîm bigirin”
Têkoşînê mezin bikin
Ocalan xwest ku herkes piştgiriyê bide çalakiyên Nobeta Edaletê û têkoşînê bilintir bikin û got: “Divê hevalên me yên li derve bibin dengê girtîgehan. Bila vî barî nedin ser pişta hevalên me yên zindanan. Ji bo şikandina tecrîda li ser birêz Ocalan grevên birçîbûnê hatin destpêkirin. Divê em li derve jî li dijî vê têbikoşin. Werin em bi pêşengiya ciwanên xwe vê têkoşînê mezin bikin.”
Piştî axaftina Omer Ocalan, hunermend Şêrzat Arslan, derket ser dike û stran gotin. Di konserê de ciwanan bê navber dirûşmên “Bijî berxwedana zîndanan”, “Ciwan fedaiyên Apo ne” û “Bijî Serok Apo” berz kirin. Kesên beşdarî konserê bûn govend gerandin. Konser bi govendê bi dawî bû.
