Şaxa Komeleya Mafên Mirovan (ÎHD) a Wanê di çarçoveya Hefteya Mafên Mirovan de bi mijarên “Armanca polîtîkayên tecrîdê û bandora wê ya li ser girtîgehan” û “Binpêkirinên mafên mirovan” li avahiya baroya Wanê panelek li dar xist. Hevseroka Navenda Mafên Mirovan a Baroya Wanê Bûrcû Şeber, Hevberdevkê Kongreya Demokratîk a Gelan (HDK) Cengîz Çîçek û parlamenterê Partiya Wekhevî û Demokrasiyê ya Gelan (HEDEP) ê Mûşê Sezaî Temellî axivîn.
Di panela ku gelek kes amade bûn. Hevberdevkê HDK’ê Cengîz Çîçek qala tecrîda mutleq a li Îmraliyê kir û wiha got: “Armanca bingehîn a tecrîdê ew e ku ji aliyê netew dewletan ve pêşî li belavbûna paradîgma û ramanên Birêz Ocalan bê girtin ku belavî cîhanê bibin. Her wiha serhildana birêz Ocalan a li dijî pergala kapîtalîst a li ser bingeha bêstatubûna gelê kurd hatiye avakirin e.”
Çîçek, destnîşan kir ku kurd û dostên wan Abdullah Ocalan weke Rêberê Kurdan qebûl dikin û ev yek ji aliyê netew dewletan ve weke rewşeke bixeter tê dîtin. Çîçek, axaftina xwe wiha domand: “Paradîgmaya Neteweya Demokratîk û Konfederalîzma Demokratîk ku Ocalan li dijî dewletên kapîtalîst derxistiye holê, weke xeteriyekê tê dîtin. Dewlet û hêzên kapîtalîst armanc dikin ku Rêberekî gelek rakir ser piyan û li Rojhilata Navîn rewş guhert, li Îmraliyê tecrîd bikin û asteng bikin ku ramanên wî derkevin derve. Hemû bêhiqûqiyên li dijî birêz Ocalan pişt re belavî hemû girtîgehan bûn û hêj jî berdewam dike.”
Parlamenterê HEDEP’ê Sezaî Temellî jî anî ziman ku li Tirkiyeyê hemû binpêkirinên mafên mirovan girêdayî tecrîdê ne û wiha got: “Ne li Tirkiyeyê ne jî li cîhanê mînakeke din a tecrîdê nîne. Em li hemû qadan bandora tecrîdê dibînin. Hêzên kurewî û pergal, Ocalan ji xwe re weke xetereyekî dibînin. Sedemê ku weke xetere dibînin jî paradîgmaya wî ya aştiyê bîne erdnîgariya Rojhilata Navîn e.”
Temellî da zanîn ku sedema tecrîdê wê bi xwendinên dîrokî baştir bê fêhmkirin û wiha lê zêde kir: “Tecrîd pirsgirêkeke hiqûqî ye û binpêkirina mafên mirovan e. Sedema herî girîng a ku AKP zêdeyî 20 sal in li ser desthilatê ye, tecrîda ku ferz kiriye ye. Mudaxelekirina Ocalan rasyonelîteya dewletê xera dike. Piştî sala 2015’an, piştî pêvajoya çareseriyê dewlet û hikûmetê ji bo ku pergala xwe ya otorîter zindî bihêlin bi rengekî pir mezin dest bi komkujî û êrîşan kirin. Heke tecrîd were rakirin û birêz Ocalan azad bibe, wê pêvajoyeke veguherîna rasteqîn a pergalê dest pê bike. Pergal li şûna ku pirsgirêka kurd çareser bike, di vê pirsgirêkê de israr dike.”
Temellî, axaftina xwe wiha bi dawî kir: “Hêzên navnetewî û kurewî dema mijar dibe Ocalan û statuya kurdan bi fikra ‘hûn dikarin dev ji axaftinê berdin û bêdeng bibin’ tevdigerin. Tecrîd meseleyeke krîtîk û girîng e. Ji bilî pirsgirêkeke hiqûqî û mafên mirovan, pirsgirêkeke cîhanê biguherîne ye. Her çiqas hewl bidin tecrîd bikin jî paradîgmaya Ocalan ji ya beriya 25 salan bêhtir li cîhanê belav bûye. Fikrên Ocalan li hemû mirovahiyê belav bû û azad bûne.”
