Endamê Meclîsê DEM Partî Murad Mihçiyî bale ante pêkerdişê şaristanan û wina qisey kerd: “Pêkerdişê şaristanan teyna seba modelê prosesê weçînayîşan nîyo. Seba ney wextê verê ma do bibo modelê rêxistinkerdişî.”

Mihçîyî vist vîrî ke weçînayîşanê gulane ra dima kombîyayîşanê şarî de rexneyê girîngî ameyê kerdene û vat: “Şarî rexne kerd ke ma prosesê weçînayîşan de goş nêdayo înan ser. Ma nê rexneyan heqdar vînenê. Şarî waşt ke ganî derheqê dîyarkerdişê namzetan de goş bêro dayene pêşnîyazanê ci ser.

Seba ke ma namzetanê xo dîyar bikerê seba pêkerdişê şaristanan dest pê pêvînayîşan kerd. Tay cayan de eşkera bî ke namzetî do kam bibê. Ma do pêro rojawanê Tirkîya de zî modelê pêkerdişê şaristanan ser o xebatanê xo rê dewam bikerê. Pêkerdişê şaristanan do bikero ke rayîro hîrêyîn bipawîyo û pêro dînamîkê herêmî, sîyasî, dînî û têgêrayîşî û erjanê demokrasî û azadîye têkoşînê ma de cabigêrê. Sîstemêkê  pêkerdişî do bêro awankerdene. Embazê ma seba dîyarkerdişê namzetan nika şarî reyde qisey kenê. Pêkerdişê şaristanan teyna seba modelê prosesê weçînayîşan nîyo. Seba ney wextê verê ma do bibo modelê rêxistinkerdişî.”