Çalakiya Nobeda Edaletê ya ku ji aliyê Komeleya Alîkariya bi Malbatên Girtiyan re (TUAY-DER) ve bi dirûşma “Em ji bo edaletê tecrîdê bişkînin, ji bo aştiya civakî li girtîgehan bibin deng” ji bo azadiya fîzîkî ya Rêberê PKK’ê Abdullah Ocalan di 5’ê kanûnê de dest pê kiribû di roja 7’an didome. Pankarta “Ji dayîkên lehengan hezar silav li zîndanan. Em ê bi hêza xwe tecrîdê bişkînin û jiyana azad ava bikin.” daliqandin. Rêveber û nunerên Federasyona Komeleyên Hiqûq û Piştevaniya Malbatên Girtî û Mehkûmên Med (MED TUHAD FED), Dayîkên Aştiyê û rêxistinên civakî li avahiya HEDEP’ê ya navçeya Rezan a Amedê serdana çalakgeran kirin. Hunermend û dengbêjên Navenda Çandê ya Dîcle Firatê ku beşdarî nobedê bûn stranan gotin. Di çalakiya “Nobeta Edaletê” de çalakgeran dirûşma “Bijî berxwedana zîndana” berz dikirin. Beşdaran bi tilîliyan li çepikan xistin. Serlêdana nûnerên sazî û rêxistinên civakî ya çalakgeran didome. Kesên diçin serdanê bi çalakgeran re li ser girîngî û wateya çalakiyê niqaşan dikin û piştgiriya xwe tînin ziman.