Sekreterê Mîyanneteweyî yê Partîya Komunîste ya Swêdî Karl Gunnarsonî dîyar kerd ke partîya înan ‘qanûnê terorî’ yê ke Swêdî vera kurdan vet şermezar kena.

Gunnarsonî ard ziwan ke Erdoganî verê cû endamîya Swêdî nêwaştêne û vat: “Seba ke Swêdî tesdîqê Tirkîya bigêro zaf xîret kerd. Hukmatê Swêdî û Parlamentoyê Swêdî seba ke bibo endamê NATOyî qanûnê terorî waştişê Tirkîya ser o qebul kerd ke no zî tawîzêko pîl o. Netîceya nê qanûnî de aktîvîstê kurdî teslîmê Tirkîya ameyî kerdene û îhtîmalêko pîl o ke zîndan de nê aktîvîstî raştîyê îşkenceyî ameyî. Partîya Komunîste ya Swêdî no şermezar kerd.”

Gunnarsonî îfade kerd ke Swêdî şert û mercê hukmatê Erdoganî qebul kerdê û no zî mojneno ke endamîya NATOyî Swêdî rê zaf girîng a. Gunnarsonî vat: “NATO îtîfaqêko leşkerî yo emperyalîst o û seba menfaetanê sermayeyanê endamanê xo têgêreno. Yanî menfaetê NATOyî dûştê menfaetanê şaran o. Partîya ma endamîya Swêdî şermezar kena û vera ney têgêrena.”

Karl Gunnarsonî pare kerd ke seba ke Swêdî waştişê Erdoganî qebul kerd rayaumûmîye de hêrs virazîyayo û vat: “Vera endamîya Swêdî ya bi NATOyî muxalefetêk est o la heyf ke no muxalefet qels o.”