Hemsereka DEM Partî ya Amedî Pinar Sakik Tekîne vat ke meydananê Newroze eşkera bî ke qeyûmî do weçînayîş ra pey bierzîyê çopê tarîxî.

Tekîne îfade kerd ke na Newroze de ruhê serranê 90an est bîyo û vat: “Tirkîya, Kurdistan û Ewropa de verê her keyeyê kurdan de adirê Newroze ame tavistene. Amed de zî rixmê varayîş û Remezanî zî qerebalixêko pîl est bî. Na Newroze vera polîtîkayanê asîmîlasyon, qeyuman û îqtîdarî cewabêk bîye. Newroze de mesajê girîngî dîyayî û azadîya Birêz Ocalanî û çareserîya meseleya kurdan ameyî waştene. 

Şarê kurdî Newroze de vat ‘azadîya Rayberîye, azadîya ma ya.’ Ma Newroze de fam kerd ke tecrîd seba pêro şaran mesele ya û seba aştîye ganî tecrîd bêro wedaritene. Meydananê Newroze ra na netîce vejîyaye ke qeyûmî erzîyayî çopê tarîxî.”

Tekîne pare kerd  ke hêriş û tedayî pê şarî nêeşkayê û vat: “Newroze de ame waştene ke wa şarê kurdî yew bibo. Na Newroze de qalê Leyla Zana zaf ame kerdene. Leyla Zana ancî mîyanê şarî de tesîrêko pîl viraşt û ruhê 90an gandar kerd. Ma bi nê hîs, tesîr û tewirê şarî şinê weçînayîşanê 31ê adare. Şarê kurdî ancî sindoqan de cewabêkê xurtî bidê ferasetê dizdî. Her raye do qeyûman rê bibê lapatêke.”