QSDyî bîlançoya menga nîsane ya hêrişanê artêşa tirke yê vera Rojawanî eşkera kerde û vat: “Dewleta tirke seba ke dinya bi şerê Ukrayna-Rûsya xejilîyaye ya nê sey firsetî şuxulnena, hêrişanê xo zêdînena û plananê îşxalî yê neweyan kena.”
Merkezê Îrtîbatî û Çapemenîye yê Hêzanê Sûrîyeya Demokratîke (QSD) bîlançoya menga nîsane ya hêrişanê artêşa tirke yê vera Rojawanî eşkera kerde.
Eşkerayîye de nê ameyî vatene: “Dewleta tirke ya îşxalkere û çeteyê ci xeylêk wexto vera Rojawanî sûcan kenê. Bitaybetî dewê ke cepheyê şerî de hewa û erdî ra yenê bombardumankerdene, sîvîlî yenê kiştene. Dewleta tirke seba ke dinya bi şerê Ukrayna-Rûsya xejilîyaye ya nê sey firsetî şuxulnena, hêrişanê xo zêdînena û plananê îşxalî yê neweyan kena. Hetê bînî ra medyaya tirke propaganda kena û bi xeberanê zûran vana vînîbîyayeyê ma estê. Dewleta tirke sere de asûrîyanê dewanê Şehba, Eyn Îsa, Girê Sipî û Minbic de şarê sîvîlî hedef gena. Pê nê hêrişan yeno waştene ke şar erdê xo caverdo. Menga gulane de Zirgan, Til Temir, Eyn Îsa, Girê Sipî, Minbic, Şehba û Kobanê de vera bananê sîvîlan bi hezaran ton madeyê teqnayîşî ame şuxulnayene û ziraro pîl dîya keyeyan. Hetê bînî ra destûr nêdîya şar şiro goranê xo ser. Hêrişî bîyî sebebê astengkerdişê dezgehanê Îdareyê Xoserî. Roşanê Remezanî de zî hêrişan dewam kerd.”
Goreyê eşkerayîya QSDyî bîlançoya hêrişan wina ya:
“Erdî ra 596 hêrişê top, tank û obusan, 13 hêrişê SÎHA, 2 hêrişê xokiştişî yê teyarayan, 3 hêrişê fuzeyan, 19 hêrişê suîqestî, 122 hêrişê doçka, 1 hêrişê BKCyî. Vera keyeyan û hêgayanê dewijan 23 ton madeyê teqnayîşî ameyî şuxulnayene; 36 hezar keyeyan zirar dî, dezgehê ceyran û awe û dibistanêkî zirar dî, 2 sîvîlî û 5 şerwanî şehîd bîyî, 23 hemwelatîyî dirbetin bîyî.‘‘
