Serekê verênî yê TGSyî Ercan Îpekçîyî rojnamegerê tepişteyî zîyaret kerdî û wina vat: “Ganî her kes paştî bido rojnamegeranê tepişteyan, heta ê azad bibê têkoşîn bikero.”

25ê teşrîna verêne de 11 rojnamegerê kurdî ameybî destbendkerdene û nînan ra 9 tenî 29ê teşrîna verêne de ameybî tepiştene. Serekê verênî yê Sendîkaya Rojnamegeran a Tirkîya (TGS) Ercan Îpekçîyî rojnamegerê tepişteyî Zîndanê Sîncanî de zîyaret kerdî. Îpekçîyî ANFyî rê qisey kerd û dîyar kerd ke vera rojnamegeranê kurdan tedayêka girane est a.

Îpekçîyî îfade kerd ke îqtîdarê AKP-MHPyî rojnamegeranê kurdan bi îdîaya ‘endamîya rêxistine’ krîmînalîze keno, tepişeno û keno ke medyaya mixalîfe zî bivisno binê kontrolê xo. Îpekçîyî vat: “Îqtîdar pê nê hêrişanê sîstematîkan armanc keno ke medya bigêro binê teda, verê bihêzbîyayîşê mixalefetê komelkî bigêro û verê yewbîyayîşê mixalefetî bigêro. Vera ney ganî mixalefet bi paştdayîş û yewbîyayîşî têbigêro. Ganî her kes paştî bido rojnamegeranê tepişteyan, heta ê azad bibê têkoşîn bikero yanî vera hêrişanê sîstematîkan û rêxistinkerdeyan têkoşînêkê rêxistinkerdeyî bikero.”

Îpekçîyî pare kerd ke rojnamegeranê tepişteyan Zîndanê Sîncanî ra mesajêk şawito. Îpekçîyî vat: “Embazanê ma yê rojnamegeran vat ke înan rê mekan muhîm nîyo ê do her ca de û tim serê rêçê Musa Anter, Gurbetellî Ersozan de tradîsyonê çapemenîya azade rê dewam bikerê. Ê zî zanenê ke sucdarîyê vera înan têna karê rojnamegerîye yê. Moralê înan zaf berz o û seba paştdayîşan selam kenê.”