Haci Esvet û domanê ci Adîl û Celal Şenyaşar yê ke hetê merdimanê parlamenterê AKPyî Yildizî ra ameybî qetilkerdene, ameyî yadkerdene. Esnafanê Pirsûsî vera na bêedaletîye dikanê xo anêkerdî.
14ê hezîrana 2018î de qezaya Pirsûsî ya Riha de pawitox û merdimanê parlamenterê AKPyî Îbrahîm Halîl Yildizî dikanê keyeyê Şenyaşarî de hêrişê înan kerd. Hêriş de Celal, Adîl, Mehmet, Fadil û Ferît Şenyaşar dirbetin bîyî û wedarîyayî Nêweşxaneyê Pirsûsî. La merdimanê Yildizî reyna hêrişê keyeyî kerd. Hêriş de Celal û Adîl Şenyaşar ameyî qetilkerdene û babî Haci Esvet Şenyaşar zî verê çimanê cinîya xo Emîne Şenyaşare de ame lînçkerdene û kiştene.
Reya verêne Haci Esvet û domanê ci Adîl û Celal Şenyaşar yenê yadkerdene. Merasîmê yadkerdişî ‘Kuçeyê Bîr Mîlyoncular’ de ame kerdene. Ferît Şenyaşaro ke hêriş de dirbetin bîbî û dadîya ci Emîne Şenyaşare 463 rojî yo verê Edlîyeya Riha de Nobeta Edaletî rê dewam kenê. Emîne û Ferît Şenyaşar edlîye ra verî ameyî cayê qirkerdişî û qeranfîlî nayî ro. Esnafanê Pirsûsî zî seba ke vera na bêedaletîye nêrazîbîyayîşê xo bimojnê dikanê xo anêkerdî.
Ferît Şenyaşarî verê dikanê înan qisey kerd û vat: “3 endamê ma 14ê hezîrana 2018î de ameyî qirkerdene. Dima Nêweşxaneyê Pirsûsî de hêrişê ma ame kerdene. Rixmo ke serebûtî 4 serrî xo pey de verdayî la hema zî dewa nêameye roşnîkerdene. Ma na dewa de qurban ê. Pêro şarê Pirsûsî nê serebûtî hol zaneno. Ewro goristan de yadkerdiş do bêro kerdene. Esnafanê Pirsûsî zî dikanê xo anêkerdî û tewirê xo mojna.”
Dima Goristanê Şaredarîye yê Pirsûsî de ameyî yadkerdene. Keyeyê Şenyaşarî, esnafê Pirsûsî, Hemserekê KCDyî Berdan Ozturk, Hemsereka DBPyî Salîha Aydenîz, parlamentera HDPyî ya Riha Ayşe Surucu, Mayê Haştîye, Platformê Kede û Demokrasî, Îdarekarê HDPyî zî tede xeylêk kesî tewrê merasîmî bîyî.
