Dewleta tirke 17ê nîsane de vaşûrê Kurdistanî de herêma Zapî de yew êrişo neweyo qirker dest pêkerd. Enê êrişanê ke talîmatê Erdoganî reyde dest pêkerd ne êrişê neweyî yê, ne zî peynîyên ê. Labelê çimê sîyasîyî enê êrişan semedê Erdoganî şerê mayîşî û nêmayîşî pênase kenê… Buyerê ke enê rojan de vejîyayî orte, enê vatişî erê kenê…
Erdoganî 7ê hezîrana 2015î de biryarê şerî da û a roje ra heta na roje verva şarê kurdî êrişanê qirkeran berdewam keno. Şarê kurdî zî çarparçeyê Kurdistanî de verva enê êrişan xo ver dano û rejîmê Erdoganî verva qedênayîşî zî beno.

Bi enê atmosferî de Erdogan yew gefê neweyî Rojavayê Kurdistanî ser kerd. Rana behsê dagirkerdiş, kiştiş û qirkerdişî keno. Kinarêk de Tirkîya binê krîzê ekonomîkî de pelçikena, kinarêkê bînî de zî êrişê verva kurdan de mîlyonan reyde peran xerc kena.
Ena deluye semedê çi ya? Ena perse ez bi mînakêkî wazena bersiv bida.

Dîktatorê Arjantînî Leopoldo Galtîerî zê Erdoganî welatê xu de bîbî semedê veyşanî û heme heqê însanîyetî girowtbî binê ningan. Şarê Arjantînî binê hukmê enê dîktatorî de helak bîbî. Dîktator Galtîerîyî zî semedê îqtîdarê xu û persgiranê mîyanê Arjantînî bido vîrîkerdene 2ê nîsana 1982î de girawa Falklandî ya ke destê Brîtanya de bîye îşxal kerde. Îşxal û şerê Falklandî heta 25ê nîsane berdewam kerd. Peynîya şerî de Arjantînî verva Brîtanya şerê Falklandî vînê kerd.

Dîktator Galtîerî têna şerê Falklandî vînê nêkerd, mîyanê Arjantînî de zî verva ci muhalefet pîl bî û Galtîerîyî 17ê hezîrana 1982î de fek bi îqtîdarî ra verda. Têna veradayîşê îqtîdarî reyde nêxelisîya. Hukumato ke tira pey ame îqtîdar, semedê ci caardişê verva însanîyetî mehkeme kerd û 12 serrî cezayê zîndanî dîya ci.
Galtîerî bi ena deluye xu hem îqtîdarê xu ra bî hem zî hetê şarê Arjantînî ra ame mehkeme kerdene.

Erdogan zî zê dîktator Galtîerîyî verva şiyayîşê xo bi adirî kay keno. Enê adirê Rojava Erdogan qey paneno?
Çike Erdogan zano ke bi enê caardişan di xu reyde nêeşkeno weçînitişan qezenç bikero. Coka semedê Erdoganî serfirazîyêke lazim a. Ena serfirazî zî bi êrişê Rojava wazeno dest pê bikero. O wazeno dest pê şerî bikero, şerî ra qezenç bikero û weçînitişî bîyaro rojdem.
Erdogan bi atmosferê fetîh û cîhadî wazeno veyşanîye û krîzê ekonomîkî bido vîrîkerdene. 2015î ra pey hema hema heme weçînitişan de bi êrişê Rojava rayê xu vêşî kerdî. Ena ray zî Erdogan bi ena hêvî wazeno dest pê êrişêkî bikero û weçînitişan qezenç bikero.
Rana êrişê Rojava reyde wazeno heme muhalefetê Tirkîya bianco heta xu, yan zî vengê ci kêm bikero.

Enawa aseno ke Erdogan semedê vereroja xu enê rîskî bigêro. Persgirêke semedê ci beno ke Rojhelatê Dinya bo, verva Ewropa û NATOyî zî xu ra tersêkê ci çin yo. Ê zî semedê menfîetê xu enê êrişan erê bikê. Hesabê Erdoganî êrişan reyde raya xu 5-6 puanî vêşî bikero.

Eno hesabê Erdoganî yo, verva enê hesaban zî rana baro giran kuweno serê şarê kurdî. Coka eno şero peyên çendi semedê Erdoganî şerê mayîş û nêmayîşî yo zî, semedê şarê kurdî zî eno şer bibo şerê mayîş û nêmayîşî…