Di kulturê heme civakan de xayinî û îxanet çîyê ke zaf xirab yenî vînayîş û lanetkerdiş ê. Gelo heqîqetê xayinî û îxanetî çi yo? Îxanet hetê kamî ra yeno kerdiş? Gelo yê ke ma ci rê vanê xayin raştî xayin ê? Gelo merdim şikeno vajo ke merdimîye heme mîyanê îxanetî de ya? Gelo çiqas raşt o ke merdim heme kesî bi xayinî gunebar bikero? Gelo pîvanê xayinî û îxanetî çi yo? Gelo xayinî tenê yê ke di refê dişmenî de ca genê ê wê? Gelo kîngê ra no îxaneto bi lenet pêk yeno?

Di xozaya de heme çî çiqas bi xobîyayîşê xo ra girêdayî bimano endêke şikeno estbîyayîşê xo verdewam bikero. Bi kilmî estbîyayîşê merdimî girêdayîyê xobîyayîşê merdimî yo. Heqîqetê merdimî xobîyayîşê merdimî yo. Dûrîkewtişê merdimî yê xobîyayîşî ra yeno manaya çinbîyayîşê merdimi, yanî mergê merdimî. Îxanet yeno manaya dûrîkewtişê heqîqetê xo ra, xayinî kî yena manaya ke keso heqîqetê xo ra dûrî kewto.
Çi yo ke merdimî keno merdim nirx û rûmetê civakî merdimî yo. Nê nirx û rûmetê civakî heqîqetê merdimî yê û qabê estbîyayîşê merdimî zaf muhîm ê. Îxanet dûrîkewtiş û binlîngkerdişê nê nirx û rûmetanê civakî yo.

Îxanet qabê menfîetê xo yê şexsî, malbatî û hizbî hetkarîya dagirkeran o, hetkarîya dişmenê şarê xo yo, êrişkerdişê xoverdêranê azadîya şarê xo yo. Îxanet qabê menfîetê xo yo şexsî çinkerdişê menfîetê bi milyonan şarê xo yo.

Di kaynate de merdim fina candaro tewr bêqisûr yeno zanayîş. La mixabin îxanet tenê merdimî de virazîyo. Çimkî di kaynate de tewr zêde merdim heqîqetê xo ra dûrî kewto. Çiqas heqîqetê xo ra dûrî kewt endêke bî neyarê xo û qewmê xo. Mîyanê candaranê bînan de yew qasê merdimî xobîyayîşê xo ra, heqîqetê xo ra dûrî nêkewto. Coka mîyanê candaranê bînan de xayinî û îxanet çin o, bêbextî çin a.

Merdim biwazo mewazo na perse di serê merdimî de virazîyena. Gelo no tarîxo bi lenet yê îxanetî bi kamî dest pê keno? Gelo xayino ewilîn kam o? Gelo merdim şikeno vajo merdimîye heme verpersîyarê nê lenetî ya?

Bi raştî qet hewce nêkeno merdim xo ra dûrî ro îxanetî bigêro. Mixabin merdimî tewr zêde ro yo tewr nizdî xo îxanet kerdo, tewr zêde ro heskerdoxanê xo îxanet kerdo. Yo tewr nizdî merdimî ke merdim bi xo yo. Coka merdimî verê her kesî di sere de îxanet ro xo kerdo. Yo ke ro xo îxanet mekero nêşikeno ro civakê xo, ro nirx û rûmetê xo, ro heqîqetê xo, ro estbîyayîşê xo îxanet bikero.

Îxaneto ke merdimî sere de ro xo kerdo vejîyayîşê teberê cuya komunî yo. Merdimo ke komun ra vejîyeno henî nêvano “ma” vano “ez”. Toximê xayinîya bi vateyê “ez”î yeno ramnayîş. Çi yo ke bedenê merdimî dîl gêno û ver bi xayiniya beno rihê ez ezî yo. Îxanet ser vîrdoziya ez ezî hêşîn beno. Gorê çimeyanê tarîxî kulturê “ez ezî” bi raverşîyayîşê vîrdoziya desthilatdarîya mêrdî dest pê keno. Mêrdo Şaman, mêrdo nêçîrvan û qurnaz benê yew û darbeya ke gird dano cuya “ma” ro û warê ma de “ez ezî” bi ca kenê. A roje ra pey dûrîkewtişê merdimî xo ra û heqîqetê xo ra dest pê keno. Çiqas “ez ezî” raver şino endêk merdim merdimîya xo ra dûrî kuno û beno neyarê xo û qewmê xo. Merdimo ke xo ra dûrî kewt û bî neyarê xo di sere de ro civakê xo yo ke ci rê deyndaro rê îxanet keno.
Merdimo ke heqîqetê xo ra dûrî kewt nêweşîyê (vîrusê) “ez ezî” ro heme civaka xo vila keno û ro heme civaka xo îxanet keno. Keso ke bi hişmendîya ez ezî bi jehrî beno û beno xayin qabê ke bi ya nêweşîya xo dir rîbirî nêro wazeno civak heme bi hişmendîya ez ezî jehrî bikero û fina xo bikero xayin.

5 hezarî serî verê joy pergalê dewlete ser hişmendîya bi jehrî ya ez ezî awan bîya. Coka pergalê dewlete bi xo pergalê xayinî û îxanetî yo. Pergalê dewlete merdimî xo ra û heqîqetê xo ra dûrî fîneno. Di pergalê dewlete de her çiqas merdim bi şeklê xo merdim bo zî merdim bi hişmendîya xo, bi cuya xo heqîqetê xo ra zaf dûrî yo. Di nê 5 hezarî serî de pergalê dewlete jehrê xayinî ro heme civakanê cîhanî vila kerdo. Her ku merdim bi jehrî beno endêk heqîqetê xo ra, merdimîya xo ra, estbîyayîşê xo ra dûrî kuno û beno xayinê xo û yê civakê xo. (Do dewam bikero…)