Rojnameger Aykan Severî ard ziwan ke rixmo ke serewedaritişê Prîgojînî vinderto, tesîrê ci do Rûsya û dinya de dewam bikero.

Severî îfade kerd ke ganî serebût çarçewa şerê dinya yê hîrêyinî de bêro ercnayene û vat: “Na mesele teyna Rûsya eleqedar nêkena. No serebût raşta raşte beşêkê pêkewtişanê Şerê Dinya yê Hîrêyinî yo. Karakterê nê şerî de serebûtê winayênî qewimîyenê. Şerê Ukrayna bi derg û Putin ser nêkewt. No zî tesîrê Rûsya keno. Vilabîyayîşê Yewîya Sovyetan ra dima kapîtalîzmê olîgarkan dest pêkerd. Reyna şerê Ukrayna ra mabênê Serekê Pêroyî yê Artêşe û Wezîrê Pawitişî û serekê çeçenan de zî nakokîyî est ê. Çew nêwazeno mesuldarîya binkewtişî bigêro xo ser. Wezîrê Karanê Teberî yê Rûsya Sergey Lavrovî şerî ra 15 rojan verî vatbî ‘Ê wazenê ma bivisnê mîyanê Afganîstanêkê neweyî.’ Ey waştêne bale bianco rijîyayîşê Sovyetan ser.”

Severî bale ante xoapeyantişê Wagnerî ser û vat: “Wagner şer de sey hetê qelsî yê Rûsya ameyêne mojnayene û vajîyayêne ke o do teyna bimano. 2018 de Reqaya Sûrîye de barkerdişê petrolî ser o pêkewtiş qewimîya û tîya de 200 endamê Wagnerî hetê Amerîka ra kişîyayî. Wagner nê serebûtî sey sûcê Serfermandarîya Rûsya vîneno ke no raşt o. Çunke mabênê înan û îdareyê Amerîka de koordînasyonêk est o. No zî mojneno ke mabênê Wagnerî û artêşa Rûsya de şerê menfaetan est o. Şerê Ukrayna de artêşa Rûsya nêeşkaye Bakhmoutî bigêra û Wagner vist dewre. Wagnerî goreyê xo fedakarîyêka pîle kerde û no ca girewt. Vera Wezîrê Pawitişî û Serfermandarîye pozîsyonêko avantajin vist destî û waşt ke îqtîdarî ra hîna zaf çî biwazo.”