Badê weçînayîşî hewldayîşê neweyî virazîyenê, vera cinî û domanan de tedayî zêdîyenê. Caardişê lêşinê ke Talîban û DAIŞ vera cinî û domanan de pê ano, êdî Tirkîya de zî qewimîyenê. Yeno dîyîş ke bi ameyîşê AKPyî û tîfaqê neweyî reyde Tirkîya de hewldayîşê bedilnayîş û awankerdişê sîstemêkê neweyî virazîyeno. Krîz, şer û nê sebeban vera welat de koçkerdişêkê girdî dest pêkerdo û êdî welat teslîmê destê gonîweran yeno kerdene.

Çend rojî verê cû walîtîya Stenbolî hewl da ke qedexeyê şimitişî bîyaro la badê reaksîyonanê şarî mecbur mend ke gamêk tepîya bierzo. Derheqê babete de rojnamegere Nurcan Yalçine qisey kerd.

Yalçine vat: “Nika Talîban o ke Afganîstan de wazeno se bikero, DAIŞ o ke wazeno Sûrîye û Rojhelatê Kurdistanî de se bikero, îqtîdarê AKPyî zî wazeno eynî çîyî bikero. Gama ke ma ewnîyenê roja ameyîşî yê îqtîdarî ra heta ewro, ma vînenê ke polîtîkaya serê cinî û tutan çend kure bîya. Serê nameyê keyeyê cemaet, kursê Kuran û terîqatan wazenê Tirkîya rayra bibî. Wazenê Tirkîya bikerî sey welatêk ke bi şerîatî rayra şino. Xora Pêkerdişê Stenbolî zî ame feshkerdiş. Ganî cinîyî vera nê polîtîkayan de hişyar bibî û wayîrê heqanê xo bivejî.”

Ganî bêro teşhîrkerdiş

Yalçine dewamê qiseykerdişê xo de vat: “Medyaya komelkî de tay vîdeoyê ke bi tutan reyde reqs kenê vejîya. Nê çîyî seba ameyoxê ma baş nîyê. Tehlukeyê sîstemê neweyî ke wazenê awan bikerî mojnenê. Zîhnîyetê Talîban û DAIŞî nika Tirkîya de zî eynî çîyî kenê. Xora Tirkîya de her roje tut û cinîyî yenê tecawuzkerdiş, kiştiş, tacîzkerdiş. Nê çîyî zêdîyenê. Çiqas polîtîkaya bêcezaverdayîşî zêde bena û yena rojeve, hende kiştiş û tecawuzkerdişê cinî û tutan zêde bena. Ganî polîtîkaya înan bêra teşhîrkerdiş. Ma rojnamegerî ganî polîtîkaya dewlete teşhîr bikerî ke vernîya nê çîyan bêra girewtiş. Nê caardişan ra Tirkîyayêka tarî ma ra asîyena. Her ke ma cinîyan ra persenê ma rê vanê ke ma ameyoxê xo û tutanê xo nê welatî de nêvînenê.”

Welatê qedexeyan

Yalçine qiseykerdişê xo yê peyênan de qala qedexeyan kerd û vat: “Hewteyê şîyayeyî de Walîtîya Stenbolî waşt ke qedexeyê şimitişî bîyaro. La reaksîyonê şarê Stenbolî ra dima walîtî mecbur mend ke qerarê xo tepîya bianco. No zîhnîyetê terîqet û cemaetî yo. AKP çend şino polîtîkaya xo ya cemaet û terîqetî zêde keno. Hewl dano komelêk girewte awan bikero. Tabî nîmeyê Tirkîya paştî dano înan la girseyo ke paştî nêdano înan zî esto. Ganî înan gore zî rayra şêro. Ganî vera polîtîkaya yewkesîye de veng bêro vetiş. Na babete de bar keweno serê rojnamegeran û nê polîtîkayî ganî bêrî teşhîrkerdiş.”