Komploya 15’ê Sibate 1999’an di şexsê Rayberê Şarê Kurdî Abdullah Ocalanî de komploya çinêkerdişê şarê kurdî bî. Civaka kurd û Rayberê xo paştî da yewbînan û mirad û mexsedê komplogeran di çimanê înan de verda.
Qabê ke pergalê çinêkerdişê şarê kurdî yo ke badê şerê dinya yo yewin awan kerd, badê şerê hîrin ê dinya yo ke Rojhelato Mîyanîn de dest pê kerd bî dewam bikerê Rayberê Şarê Kurdî Rêzdar Ocalan bi komployêka mîyanê dewletan dîl girewtî û teslîmê dewleta tirke kerdî.
Di se serra peynîya serdemê dewleta osmanîyan de kurdî her tim mîyanê xoverdayişî de bî. Waştê statuya xo ya xoserî ya ke destê înan ra ameya girewtiş rayna bidest fînê. La mixabin ê serewedarnayîşî heme bi qetlîyamê civaka kurdî bi encam bî. Badê ê serewedarnayîşan heme serek û rayberê kurdan tasfîye bîyî. Civaka kurd bê serek û bê rayber, bê tifaq û bê îrade tewirê şerê yewin ê dinya bi.
Bê serekî û bê rayberî û bê tifaqî badê şerê yewin ê dinya berdêlo tewr giran bi kurdan dayî. Welatê înan bi çar parçeyî, civak bi çar parçeyî, di çar parçeyan de bê statu, bê nasname, bê ziwan mendî. Bê beyntar bi qirkerdişo sipê û fizikî ra ri bi ri mendî. Bi kilmî, qabê çinêkerdişê civaka kurd çi destê her çar dewletanê dagirkeran ra ame kerdî. Di na se serra peyîne de çi sosret û bobelat nêmend ke bi serê kurdan de nêame bo. La dewletê emperyalîstanê ke Kurdistan kerd çar parçeyî û civato kurd eştbe çarmix ro qirkerdiş û çinêkerdişê kurdan temaşe kerdê.
Rayberê Şarê Kurdî Ocalan qabê ke qarşî nê qirkerdişan veciyo di serra 1968’an ra pey mîyanê ciwananê şoreşgeranê Tirkîya de ca girewt. Badê çend serran vîna ke seba çareserkerdişê persgerîya kurd ti plan û projeyê înan çinî yo. Di sera 1973’an ra pey înan ra qeterya a û dest bi awankerdişê rêxistinêka newe ya ke çarserkerdişê persgerîya kurd esas gena kerd.
Rêzdar Ocalan û embazê xo xebatê xo yê awankerdişê rêxtinêka newe di Kurdistan de dest pê kerd. Na xebate 1973’î ra heta 1978’an 5 serrî verdewam kerd. Di serra 1978’an de na xebata xo bi awankerdişê partîya xo ya bi nameyê PKK’yî bi encam kerd.
Badê awankerdişî di wextêko kilm de PKK Kurdistan de veng da. Roj bi roj xurt bî, roj bi roj heskerdişê şarê kurdî zêde bi. Di wextêko kilm de bî partîya sereke ya Kurdistanî.
Dewleta tirke qabê ke vernî ro xurtbîyayîşê rêxistina PKK’yî biyara û xoverdêranê kurdan tasfîye bikera derbeya 12’ê Êlule ya 1980’an viraşt. Rêzdar Ocalanî na derbe texmîn kerdbî, coka o û komêke embazê xo vecîyenê teber, şinê Rojava. No vecîyayîşê teberî înan çinêkerdişî ra xelesneno. La zaf xoverdêrê kurdî qadroyê PKK’yî yenê girewtiş û kunê zîndanan. Yê ke kunê zîndanan di zîndanan de xover danê. Nêverdenê qedera teslîm girewtiş û çinêkerdişî di zindanan de dibare biba.
Rayber Ocalan û embazê xo bi moral û qewetê xoverdayişê zîndanan 15’ê tebaxa 19842î de qabê şerê çekdarî fişeka yewîne teqnenê. Na fişeka yewîna ke Dihê û Şemzînan de teqiyaye qederê civaka kurdan bedelna. Kelecan û keyfweşîyêka zaf gird mîyanê kurdan de viraşt. Şaro kurd bi şahnazî û bi zerrîgermîyêka gird ro PKK’yî wayir vecîya û paştî da ci. Mîyanê 2-3 serran de gerîlayê PKK’yî bi hezaran zêde bî û di heme erdnîgarîya Kurdistanî de bi ca bî.
Di serra 1990’an de bi hêrîşê Sadamî ya serê Quweytî û bi mudaxaleyê serkêşê kapitalîzmî Amerîka şerê dinya yo hîrine dest pê kerd. Bi mudaxaleyê Amerîka tay îmkanî vecîyayî orte. PKK enê îmkanî weş bi kar ardî û qewetê xo roj bi roj zêdetir kerd. Her ke PKK bi qewet bî tersê dewletanê dagirkeran û dewletê emperyalîstan zêde bî. Nê dewletan vîna ke PKK roj bi roj pergalê çinêkerdişîyo ke înan se serr verê joy ser kurdan awan kerd be ricnena.
Dewletê emperyalîstan bi nê mudaxaleyî xurtbîyayîşê PKK’yî qet hesab nêkerd bî. Eno qet ro weşê înan nêşîyê. Belê waştê statukoya Rojhelato Mîyanenî ro gorî menfîetê xo bi bedelnê la nêwaştê kurdan çarmix ra vecê. Coka dewletê emperyalîstan heminan di bin nameyê NATO’ye de paştî da dewleta tirke. Çek, cebilxane, teknîk, qewet, perey çi lazim be heme daye dewleta tirke. Di hetkariya xo de sînor nêşinasna. La raynêke dewleta tirke nêşika PKK’yî tafsîye bikera. Xurtbîyayîşê PKK’yî verdewam kerd û Rojhelato Mîyanen de bî qeweto sereke.
Dewletê emperyalîstan binê rayberîya Amerîka de amadekarî kerdê ke şerê hîrin ê dinya badê serRA 2000’an bi dagirkerdişê Iraqî derbasê merhaleyeko newe bikerê.
Qabê ke di merhaleyo newe de PKK diha zêde xurt nêbo û kurdan rayna bê serek û bê rayber û bê tifaq verdê û badê şerê hirîn ê dinya rayna kurdan bi qirkerdiş û çinêkerdîşî ra ri bi ri verdê bi komployêka mîyanê dewletan Rayberê Şarê Kurdî Ocalanî dîl ame girewtiş û teslîmê dewleta tirke ame kerdiş.
Hêvî û waştekê înan a bî ke finê heme serewedarnanê kurdan yê verînan di şexsê rayberî de hêvîyê serkeftişê xoverdêran bişiknê û PKK çinê bikerê, û civaka kurd se serra bîney ke bê statu verdê û bi qirkerdişan çinê bikerê. Yanî na komploya 15’ê Sibate ya 1999’an ke ser Rayber Ocalanî de pêk ame komploya çinêkerdişê kurdan bî.
La waştek û hêvîyê înan nêameyî ca. Rayber Ocalanî û şaro kurdî bi xoverdayîşê xo plansazîyê înan heme pûç kerdî. Serr bi serre Rayber Ocalan û rêxistinê xo gird bîyî, komplogerî û embazê xo qic bî. Badê 23 serran ma vînenê ke yê ke biserkewtê şaro kurd û Rayberê xo û rêxistinê xo yê. Yê ke binkewtê komplogerî û dewleta tirke yê.
Di encam de dewletê emperyalîstanê ke Rayber Ocalan dîl girewt û waştê di şexsê êy de xoverdayîşê kurdan çinê bikerê neçar mendî qarşî çetayanê DAIŞ’î de bi xoverdêranê kurdandir tifaq virazê.
Komplogeranê ke Rayber Ocalan dîl girewt eşt Îmralî waştê têkilîya Rayber Ocalanî bi dinyadir, bi şarê kurdîdir, bi rêxistin û xoverdêrandir qut bikerê. La Rayber Ocalanî bi xoverdayîşê xo, bi fikr û ramanê xo bi roşinayê şarê xo, rêxistinê xo û yê xoverdêrê kurdan. Roşinayê xo tenê nê da kurdan da heme şaranê bindestan. Her ke rayedarê dewleta tirke kewtî tengasî şî hetkarî êy ra waştê. Zaf rayan rayedarê dewleta tirke neçar mendî ke ti ra rica û lavayan bikerê.
Bi kilmî badê 23 serran gerîlayê kurdan û Rayber Ocalan bî çimeyê sûd girewtiş yê heme şaranê Rojhelato Mîyanen û heme dinya. Di encam de PKK bî rêxistinêka dinyaye, Rayber Ocalanî ke bi Rayberêko dinya.
