Di şerê xo yê topyekunî ya qarşî kurdan de çiqas binkewenê endêk riyê înan ê hov û har û qirker vecîyeno orte û endêk faşîzmê înan zêdê beno.
Di serra 2015an de Erdogan mutebaqatê Dolmabahçe betal kerd. Ser dijberîya kurdan de bi Bahçelî dir tifaqê xo yo faşîst awan kerd û vera kurdan dest bi şerêko topyekun kerd.
Di nê şerê xo yê topyekunî de zaf bi xo bawer bî. Hêvî kerdêne ke di wextêko kilm de xoverdayîşê kurdan bişiknê, rêxistina Têgêrayîşê Azadîya Kurd tasfîye bikerê, bi civato kurd çonk bidê ro û heme destkewteyanê 40 serranê peyînanê ke bi berdêlanê zaf giranan ameyê destkewtiş heminan tasfîye bikerê.

Di pêvajoyê dest pê kerdişê şerê topyekunî de hewlê derbeya cemaetê Fetoyan fîna lutfê Homayî, la înan rê virazîya. Xo rê derbe kerd mehne û bi heme qewetê xo faşîzmê xo yê bê sînor ser kurdan roj bi roj zêde kerd. Di çar parçeyanê Kurdistanî de bi heme teknîkanê xo yê şerî û bi hetkarîya NATOye çar hetan ra hêrîşê kurdan kerdî.
Şarederîyê kurdan bi destê qeyûman xesp kerdî, qabê tasfîyekerdişê sîyasetmederan, sendîkavanan, sazî û dezgehê kurdan yê sivîlan pêl bi pêl dest bi qirkerdişo sîyasî kerdî. La kerd nêkerd nêşikayî biresê mirad û mexsedanê xo yê nebixêran. Civato kurd fek xoverdayîşê xo ra vera nêda û gamêk tepîya nêeşt. Her ke kurdan xover da û mirad û mexsedê înan yê nebixêrî di qirikê înan de verda, hêrsê înan zêdetir bi, zext û zordarîya faşîzmê înan zî zêdetir bi. Her ke hêrsê înan zêdetir bi rîyê înan ê hov û faşîst û qirker zêdetir vecîya orte.

Di 10 serranê peyînan de nizdîyê 50 kurdî di binê wesayîtanê zirxîyan de mendê û cuyê xo vînî kerdî. Zafê înan gedeyê qicê bî. 22 gedayan cuyê xo vînî kerdî, 27 gedeyî birînda biyê. Rayna di 10 serranê peyînan de 45 gedeyan bi teqayayîşê teqemenîyê ke polîs û leşker xo ra pey verdayî vera cuyê xo vînî kerdî, 135 gedeyî birîndar biyê. Yew failê nê caardişan ceza nêgirewt. Heminan di binê nameyê “halê başî” de beraat kerdî. Fina her rayan kiştişê kurdan rewa ame qebûlkerdiş.

Caardişê faşîzmê dewleta tirke bi rêzkerdişî nêqedîyenê. Ma fek ro caardişanê serê verînan vera bidî. Tena caardişê ke di destpêka serra 2022î ra nata yanî di hîrê aşmanê peyînan de qewemîyayî ma tenê çend heban vîr biyarim, qabê fehmkerdişê faşîzmo ke serê kurdan yeno ramnayîş, qabê fehmkerdişê hovîtî û qirkerdişo ke serê kurdan pêk yenê bes o. Bê guman keso ke tedir hîçêk wijdan û merhamet bibo înan rê bes o. Yo ke qet wijdan û merhamet tedir çinê bo înan rê vatê ma çinî yo.

-Di pîrozkerdişê Newroza Bismilî ya qezaya Amedî de di gedeyê cêwikî yê 5 serreyî qabê ke şalwarî înan sero bî ameyî binçimkerdiş, berdî qerekol û warê engîştanê înan ameyî girewtiş. Bi seyan ciwanî, cinî û camêrdî di pîrozkerdişanê Newroze de cilanê xo yê kurdî û renginan, kesk, sûre û zerd vera ameyî binçimkerdiş. Qabê astengkerdişê pîrozerdişanê Newroze çi xirabî destê polîsanê dewleta ra ame kerdî.
-Di 10ê nîsane de, Şirnex de komîserê polîsan bi zanayî û bi qestî wesayîtê xo ramit ser avukat Serkan Karakaşî û wirdî çîmikê ci di çok de şikitî. Serkan Karakaş avukatê keyeyê Abdulgafar Dayanî yo ke di Cizîre de binê wesayîtê polîsan de mend û cuya xo vînî kerd bî, yo.

-Di 11ê nîsane de polîsan eşt serê avanîya HDPyî ya qezaya Cizîre û zaf keyeyan. Bi awayêko hovane û bi dişmenî avanîya HDPyî û keyeyê welatîyan talan û wêran kerdî. Resmê Denîz Poyraza ke bi destê çeteyanê faşîst yê girêdayeyê dewlete ameybî qetilkerdiş tede heme alavê înan ameyî binlîng kerdiş. Cilê kurdî û rengê kesk, sûre û zerd heme ameyî desteserkerdiş. Tewrê hemserekê qezaye 9 kesî ameyî binçimkerdiş, joy zî nêzana ke çi semedra ame binçimkerdiş.

-Kayê Şanoya destanê aşqê Mem û Zîne ke di beyntarê serranê 1450-1451ande qewemîya wa û di seserra 17an de bi destê Ehmedê Xanî ameya nûştiş, hetê qayûm û Qaymeqamê Cizîre ra di wargehê Mem û Zîne de ame qedexekerdiş.
-Seyitxan Ay, 28 serrî û 8 aşmî yo ke di zîndan de yo. Seyitxan Ay nêweşo û qabê amelîyatî şino nêweşxane. Doktoro ke ganî Seyitxanî emelîyat bikerdêne ti ra perseno; ti çi sûcî ra tepişte yê? Seyitxan vano; ez tepişteyo sîyasî ya. Ser nê cewabî doktor Seyitxanî rê vano; hewcedarîya to bi emelîyatî çinî ya, hewcedariîya to bi dermanêk çinî yo, ti şikenê wina bicuyê. Bi kilmî Seyitxanî ra vano; şo bimire. Goreyê raporê ÎHDyî 604 nêweşê giranî ke mîyanê înan de sîyasetmedar Aysel Tugluke zî esta di zîndanan de terkê mergî ameyê kerdiş. Tenê di aşmê peyînan de des cenazeyî zîndanan re vecîyayî teber.

-Fadil Aydemîr 30 serrî yo ke di zîndan de yo. Cezaya ci qedîyaya. Hewceyo ke henî bêro veradayîş. La qabê ke Fadil Aydemîrî vato; persgirêya kurd esta, înfazê ci soto û vera nêdanê. Bi hezaran sîyasetmedarê kurdan semedo ke poşmanîya xo nêarênê ziwan û înan ver çonk nêdanê ro bi mehneya “halo nebaşî” înfazê înan yeno veşnayîş û nînê veradayîş.
-Roje çinî ya ke ma zîndanan ra xeberê hêrîş, îşkence û tedayan nêgêrî. Tewr peynî di 11ê nîsane de zîndanê Silîvrî de 60 gardîyanî hêrîşê tepişteyan kerd. Di tepişteyî qetil kerdî û yew tepişte bi giranî birîndar kerdî. Bi hêrîşan û îşkenceyanê xo tepişteyan sewqê întixarî kenê. Cilêt û la înan het nanê ro ke ê xo bikişê.

-Ciwanê kurdî di Stenbol de serê cadeyê Îstîklalî de deyîranê kurdî vanê. Polîsê tirkî vînenê ke deyîran bi kurdî vanê. Tehamul nêkenê, hêrîşê ciwanan kenê, înan derb kenê, amûrê înan desteser kenê û înan bin çim kenê.

-Bi mehenya wekîla Amedî ya HDPyî Remzîye Tosune 2019î de di qezaya Hênê ya Amedî de şîya tewrê dewetêk biya û dewete de deyîrê kurdî ameyê vatene. Derbarê aye de fezleke ame hedrekerdiş. Nameyê deyîra kurdî ke beno “bi deyîr propogandaya rêxistine kerda.
-Di serra 2014an de mabeynê Raybarê Şarê Kurdî Ocalan û dewlete de muzakere bibî. Îqtîdarê AKPyî her roje qasidî kerdêne rayîrê Qandîl. Zaf kesan bi gerîlayan dir fotografî antî. O wext de wekîla Amedî Semra Guzele ke bi destgirewteyê xo dir fotoraf ante. Bi mehneya ke fotografê wekîla Amedî Semra Guzele bi destgirewteyê aye dir esto, destnêdayîşê aye wedarîya, derbarê aye de doze akerdî û qerarê tepiştişê aye dîya.
-Keso bi nameyê Samî Tay Wan de, parka Mûsa Anterî de di telefonê xo de deyîra bi nameyê “Erdalê Pirsûsî” goştarî keno. Vengê deyîre şino polîsan, polîsî Samî Tayî kenê bin çimî û telefonê êy desteser kenê. Serdozgerîya Wanî bi mehneya ke propogandaya rêxistine kerdo derbarê ci de doz keno a û 5 serrî ceza wazeno.

-Qabê ke îbadetê xo bi ziwanê kurdî kenê û nêbenê hetkarê AKPyî, melayê kurdî yê endamê DÎAYDERî bi hêceto endamê rêxistine yeno tepiştiş û komeleya înan DÎAYDER îlegal yena îlankerdiş. No bes nêkeno bi ser de wazenê Şaredarîya Stenbolî bi ser DÎAYDERî de îlegalîze bikerê.

-Qatîlo faşîst yo ke hêrîşê avanîya HDPyî ya Îzmîrî kerd û Denîz Poyraze qetil kerd di mahkeme de zerweşîya xo areno ziwan û veradayîşê xo mehkema ra wazeno. Faşîsto ke Enqera de hêrîş beno ser avanîya HDPyî û kesêk birîndar keno, badê îfadeyî serbest yeno veradayîş. Fina ti ra vacê; to karê xo nîmcet kerdo, şo tamam bike.

-Keyneka bi nameyê Zîlane di Mêrdîn de ser hesabê xo yê medyaya civakî de fotografê gerîlaya cenî ya Zapatîsta ya ke bebikê xo verarê xo de lawnena û fotografê ceniyêka êzidî ya destê aye de çek esto dana têver. Nê fotografî vera serdozgerîya Mêrdînî doz akeno a û 2 serrî ra heta 5 serran ceza aye rê wazena.

-Dayika aştîye Meryem Soylu ya 79 serrî, qabê beyanatêk da û qabê ke aîdat da Komaleya Dayikanê Aştîye ya ke endama komeleyî ya û qabê ke nameyê aye di lîsteya nobeta komaleye de esto, mehkema 6 serrî û 3 aşmî ceza ro ci birna.

-Bajarê Amedî paytextê zerîya heme kurdan o. Qabê heme kurdan cayêko zaf muhîm û qedîm o. Bi xoverdêrîya xo ya qarşî faşîzmî yeno şinasnayîş. 1975 de şarê Amedî bi xoverdayîşê xo nêverda serekê faşîstan Turkeş bikewo Amedî, teyaregeh ra êy qewernenê û apey rişawenê. Nika wazenê nameyê Bahçelî yo ke çiraxê Turkeşî yo di Amed de ro parkê Qirklardaxî bikerê.
Se serrî yo dewleta tirke ma qetil kena û nameyê qatîlanê mayke ya danê dibistanan, ya danê avahîyanê dewlete û ya danê parkan ke ma hovîtîya înan xo vîra nêkerim.
Fina ke mi sere de vat; caardişê faşîzmê îqtîdarê AKP-MHPyî bi rêzkerdiş nêqedîyenê. La qabê kesê ke hîçêk wijdan û merhemet tedir bibo, enê besê û zafê.

Gelo kamco kurdo ke hîçêk wijdan û merhamet tedir bibo şikeno nê faşîzmî qebûl bikero û bêveng bimano. Îqtîdaro faşîst yê AKP-MHPyî bi nê kiryaranê xo kurdan rê vano; ez estbîyayîşê şima qebûl nêkena û ez do şima çinî bikera.

Şarê kurdî ke di Newroza 2022an de vat; şima nêşikenê mi çinî bikerê. Û serkewtişê xo yê qarşî şerê topyekunî yê 7 serranê peyînan îlan kerd. Şarê Kurdî nîşan da ke xoverdêrîya xo ra fek vera nêdano û çi qewetêk nêşikeno bi înan çonk bido ronayîş. Ya ke înan har kena, xoverdêrî û vindertişo qedîm yê şarê kurdî bi xo yo.
Vatişêkê verînan esta vanê; çiqas peynî zaliman nizdî bena endêk zilmê înan zêde beno.