Hemsereka Heyetê Rayberdişî yê Meclîsê Sûrîyeya Demokratîke Îlham Ehmede bimbarekkerdişê Newroze de sîstemê yewrengî rexne kerd û wina vat: “Bi rejîmê yewrengî merdimîye yena îmhakerdene. Çiqas şar û kulturî zaf bê, hende cuye rind bena.”

Hemsereka Heyetê Rayberdişî yê Meclîsê Sûrîyeya Demokratîke Îlham Ehmede mesajê vîdeoyî şawit resepsîyonê Newroze yê Îngîlîstanî. Ehmede mesaj de Newroze wina erjnaye:

“Newroze senî ke nameyê ci ra zî yeno famkerdene, semedê kurdan û şaranê Rojhelatê Mîyanênî yena manaya roja newî. Badê ronayîşê dewletanê serdestan û parçekerdişê Kurdistanî îşxalkeran bi hewayêkê sîstematîkî kerd ke Newroze kurdan rê bikerê qedexe.  Adirtafînayîş zî xeylêk wext qedexe bî. Ewro Tirkîya, Îran û Sûrîye de vera ziwan, kultur û ciwîyayîşê kurdan qedexeyî est ê ke ganî cade bêrê wedaritene. Ganî sîyasetê vera kurdan bêro bedilnayene û semedê dewaya şarê kurdî ya heqdare ewnîyayîşo newe bêro dîyarkerdene.

Bitaybetî seserra Pêkerdişê Lozanî de ganî sîyasetê vera kurdan newe ra bêro destgirewtene. Rengî çend zaf bê, cuya hende rind bena. Bi rejîmê yewrengî merdimîye yena îmhakerdene. Çiqas şar û kulturî zaf bê, hende cuye rind bena. Ma sey kurdanê Sûrîye yanî kurdanê Rojawanî bi serran dejê rejîmê BAASî ant. Ma vanê wa nê dejî hinda biqedîyê. Ma ewro sey bi se hezaran kurdan vejîyenê meydanan na roje pîroz kenê û mesajanê xo yê sîyasî û kulturkî danê.”

Ehmede wina dewam kerd: “Kurdî semedê pawitişê merdimîye û medenîyetî rolê serkêşî kay kenê. Hêzê mîyanneteweyî semedê qedînayîşê sîyasetê qirkerdişê vera kurdan ganî berpirsîyarîya xo bîyarê ca. Senî ke Newroze roja wayûbiratîye, aştîye û azadîye îfade kena, ewro Rojawan de bi mîlyonan ereb, kurd, tirk, armenî û asûrî sey dost û wayûbirayan yenê têhet. Ma ganî nika na roje bikerê roja aştîye. Hêvîya ma na ya, cehdkerdişê ma no yo. Ma hêvî kenê ke na serra newî do bêrê çareserîya sîyasîyî û aştîye abikero.”