Gokhan Yildirimo ke 256 rojî rojeyê mergî kerd, perey vera dîya û wina qisey kerd: “Ez ewro xêrê xoverdayîşî ra tîya de ya. Bê xoverdayîşî çîyêk nêkeweno destî.”

Komela Paştdayîşê bi Keyeyanê Tepişte û Hukmwerdeyan (TUAY-DER) seba Gokhan Yildirimo ke pê waştişê muhakemebîyayîşê edîlî 256 rojî rojeyê mergî kerd û perey vera dîya, taxa Guzeltepe ya Eyupî de eşkerayîyêke daye. Gokhan Yildirim, avûkatê Buroyê Huqûqî yê Şaran û embazê ey tewrê eşkerayîye bîyî. Eşkerayîye de polîsan dekewtişê keyeyî de nasnameyê beşdaran qontrol kerdî.

Yildirimî eşkerayîye de ard ziwan ke o bi hawayêkê bêhuqûqî tepişîyabi û vat: “256 rojî ez rojeyê mergî de menda. Ma zîndan de qîrayî, embaz û keyeyê ma teber de bîyî. Na safha de xeylêk kesî ameyî destbendkerdene û hêrişî bîyî. Prosesê grevê vêşanîye de ma Mustafa, Hêlîne, Ebru şehîd dayî. Dezgehê Tipê Edlîyî (ATK) veradayîşê mi asteng kerd la ma ser kewtî.

Mi dest pê rojeyê mergî kerd la ez cuye ra hes kena. Ez ewro xêrê xoverdayîşî ra tîya de ya. Bê xoverdayîşî çîyêk nêkeweno destî. Ez venga şarê ma dana ke rayîrê serkewtişî xoverdayîş o.”

Nameyê TAYADî ser o Naîme Kaya eşkerayîye wende û vat: “Ma venga şarê xo danê ke dormeyê têkoşînê meşrûyî de ser bikewê.”