Hemserekê HDPyî yê Dêrsimî Ferhat Yildizî Terteleyê Dêrsimî ser o qisey kerd û ard ziwan: “Ma wazenê wa dewlete nê qirkerdişî qebul bikera û şarê Dêrsimî ra uzrê xo biwaza.”

Dima ke Komara Tirkîya ronîyaye 25ê kanûna 1935î de derheqê eyaletê Dêrsimî de dewlete raporêk amade kerdbî û bi nê hawayî prosesê Terteleyê Dêrsimî dest pêkerdbî. 4ê gulana 1937î de zî bi fermanêkî qirkerdişî dest pêkerd.

Hemserekê HDPyî yê Dêrsimî Ferhat Yildizî derheqê babete de PÎRHA rê qisey kerd. Yildizî îfade kerd ke 4ê Gulane netîceya planê têgêrayîşê qirkerdişî bî û vat: “4ê Gulane ra verî zî, wextê Osmanîyan de û wextê Komare de tim ‘înşaya dewlete’ ser o bernameyêk est bî. Seba ke dewleta neteweyî ya tirkan bêra awankerdene, ame waştene ke pêro neteweyê bînî bêrê çinkerdene. Qirkerdişê Armenîyan, Pontus-Rum, Koçgirî û Dêrsimî nê armancî ser o ameyî kerdene. Serrê 1937-38î noqtaya peyêne ya Terteleyê Dêrsimî bîyî.”

Ferhet Yildizî ard ziwan: “Dêrsimî destpêkî ra nata xo îdare kerdêne. 4ê Gulane ra verî pêro çekî ameyî arêdayene, planê têgêrayîşî ame amadekerdene û seba tarûmarkerdişê Dêrsimî têgêrayîşî dest pêkerd. Armancê Terteleyê Dêrsimî no bî ke wa kurdî bibê tirk û elewîyî bibê sunî. Ma wazenê wa dewlete nê qirkerdişî qebul bikera, şarê Dêrsimî ra uzrê xo biwaza û cayê goranê Seyîd Riza û 6 embazanê ci eşkera bikera.”