Platformê Vengê Tepîşteyan pare kerd ke nêzdîyê 18 hezar tepîşteyî tesîrê erdlerzî de mendê û merdimanê xo reyde têkilîyan nêeşkenê virazê.
Eşkerayîya Platformî de nê çîyî ameyî vatene: ‘‘Rîyê erdlerzan ra Vakurê Kurdistanî, Tirkîya, Rojawanê Kurdistanî û Sûrîye de bi des hezaran însanan dinyaya xo bedilnaye û se hezaran însanî zî birîndar bîyê. Bi mîlyonan kesî zî bê war mendê. Seba ke dewlete erey destkarîya xirban kerde xeylê însanî merdî. Hetkarîya ke hetê zerrîwazan ra ameyêne kerdene, a zî ameyêne astengkerdene.’’
Komela CÎSSTyî zî derheqê rewşa tepîşteyan de eşkera kerd ke herêmanê erdlerzî ra 17 hezar û 600 tepîşteyî tesîrê erdlerzî de mendê û wina ame vatene ‘‘Goreyê zanayîşanê ke ma tepîşteyan, merdimê tepîşteyan û çapemenî ra girewtî, tayê tepîşteyî sewqê herêmanê bînan bîyî û tayê înan hema zî zîndananê herêman de yenê tepîştene.’’
