Dêrsim de eşkerayîya ke hetê HDP, DBP û TJAyî ra dîyaye de wina ame vatene: ”Perwerdeyê bi ziwanê dayîke şert o û heqê her kesî yo.”

Tirkîya û Vakurê Kurdistanî de vizêr dibistanan de termînê payîzî, mîyanê waştişanê perwerdeyê bi ziwanê dayîke de dest pêkerd.

Kuçeyê Hunerî yê Dêrsimî de Rêxistinanê HDP, DBP û TJA seba perwerdeyê bi ziwanê dayîke eşkerayîyêke daye. Eşkerayîye de pankarta bi kirmanckî ameye akerdene. Hemserekê HDPyî yê Dêrsimî Ferhat Yildizî eşkerayîye wende.

Yildizî da zanayene ke domanê kurdî seba ke perwerdeyê bi ziwanê dayîke ra bêpar mendê bi qesawet û tersî dest pê dibistane kenê û vat: “No zulm bi seserran o dewam keno. Temamîya tarîxê Komara Tirkîya de ma ameyî qetilkerdene, surgunkerdene, heqê perwerdeyê bi ziwanê dayîke destê ma ra ame girewtene, bawerîya ma ameye înkarkerdene û ma ameyî asîmîlekerdene.”

Hemserek Yildizî qiseykerdişê xo rê wina dewam kerd: “Perwerdeyê bi ziwanê dayîke şert o û heqê her kesî yo. Dêrsim şaristanê elewîyan o la serranê peyênan de polîtîkayê asîmîlasyonî zêdîyayî. Her roje venga ezanî dîyena, no zulm û îşkence yo. Hînî asîmîlasyonî ra fek vera bidê, hende zulm bes o.”