Serokkomarê dewleta tirke Tayyîp Erdoganî tarîxê weçînitişan 14ê aşma gulane eşkera kerd. Labelê semedê enê weçînitişan zaf pirsê nêzelalî estî.
Pirso yewin; dîktatoro ke weçînitişêk vînî keno ey virazeno yan zî nêvirazeno. Pirso diyin zî; eke qerarê viraştena weçînitişan bido zî ey weçînitişî çandi ewleyî, bê hîle û goreyê şert û mercanê demokrasî bêrê viraştene.
Pirso hema zî ke şênê vêşî bikerê. Çiko raştîya Tirkîya hama yew merhele ke, yew rayadar bê zur û hîle nişto sîyaset virazo. Mabênê vatoxê rayadaran û raştîya miletî de zaf mesafe esto.
Ma reyna tadîyê pirsê xo yê yewinî “Dîktator bi rîskê vînîkerdene de weçînitişêk virazo yan zî nê?”.
Eke ma buyerê peyênî rê biewne, tehlukeyê nêviraştena weçînitişan hama zî esto. Mînak propagandaya şerî! Faşîzmê AKP-MHPyî yew pola bahsê kiştena kurdan keno, hêrişê xunê dagirkerî serê Vaşûrê Kurdistanî de kêm nêkeno, polê bînî ra zî bahsê hêrişê Rojava taybetî zî Kobanê keno. Eke bişên bo hêrişêk serê Rojava de dest pê bikero, eno hêriş hem semedê serkewtena weçînitişî hem zî semedê betalkerdene yan zî taloqkerdena weçînitişan şêno karbîyaro.
Buyero bîn zî ‘padayîşê HDPyî’ yo. Dîktator wazeno HDP pado, hetta mehkema HDP ard yew merhele ke yew roje weçînitişan ra bimano zî reyna şêno HDP pado. Yanî padayîşê HDPyî destê dîktatorî de hêzê yew tehdîtî vinderto. Zeracê biwazo, şêno padayîşê HDPyî semedê betalkerdena weçînitişan karbîyaro.
Tehlukeyo herî pîl zî şerê mîyanê koalîsyonê AKP-MHPyî yo. Semedê enê buyerê kiştişê endamê MHPyî Sînan Ateş o. Eno buyer zî ma nawneno beno ke mîyanê îqtîdarî de şerê barkerdena menfeatî vecîyo. Eno îxtîmal zaf dûrî nîyo. Dîktator veyno ke weçînitişan vînî keno, şêno yew şerê mîyanê zî vecîyo.
Eke şênê enê îxtîmalan hama zê vêşî bikerê. Eyro raştîya Tirkîya hama enê merhele.
Verva enê raştîyan lazimo ke çi bikerê?
Ez vana ke semedê weçînitişan pirso yewin eno yo.
Partîyê ke bi nameyê muxalefetî xu pênase kenê verva enê planê dîktatorî neçar ê. Hem wazenê îqtîdarî bigêrî, hem zî dîktatorî ra tersenê. Verva dîktatorî yew verxwedan zî nêkenê… Belgeyê bi nameyê mutabaqatnameyê masaya 6an de heme hunerê ci eşkera bîyî, coka ê nêwazenê vêşî ser masaya 6an ser o vindê.
Mesela ma mileto ke bi zerî ra verva dîktatorîye vecîyeno ey ra yê.
Eke heme çî rayîrê xu de şêro, şarê Tirkiya û Bakûrê Kurdistanî şêrê ser sandixan. Hem semedê serokkomarî hem zî semedê parlamentoyê Tirkîya rayan nê xu karbîyarê. Yew weçînitişêk asaye bibo hem dîktator maneno, hem zî muxalefetê raştêna Tirkîya yê xeta hîrêyin yeno îdareyê Tirkîya…
Eno xeyalê min o. Ez zî zana ke yew xeyalo zaf dûrî yo.
Semedê şîyayîşê dîktatorîye lazim o ke verxwedan bêro viraştene. Bê verxwedan û teqoşîn dîktator nêşono. Wa haya her kesî xu de bibo…
